Hakha khualipi ah Sipin nih acre 28,096 chungin Hakhathar No.1 le No.2 ah Sipin nih area kaupi an chap mi cung ah keimah pakhat hmanh kaa tel lo tiah Salai Van Chan Ceu nih a chim.
Hi kong he pehtlai in Salai Van Chan Ceu nih, “Sipin nih Hakha khualipi ah Sipin area kau tuk in an lak mi arce 28,096 chung in Hakhathar No.1 ah acre 1662, Hakhathar No.2 ah acre 1366 an lak mi kong he pehtlai in Salai Van Chan Ceu nih cozah sin ah halnak a rak tuah ruang ah atu bantuk in Sipin area ah an sernak a si tiah puh ka tong.Hi Hakhathar ah Sipin nih area kaupi an chap mi cung ah keimah pakhat hmanh kaa tel lo”tiah The Hakha Post ah a chim.
“Hakha khuathar ah mi cheukhat nih a si lo tuk mi puh ka ton mi cu Salai Van Chan Ceu nih Hakhathar, (Kaifiang, Tawlangcho in Bungva tiang) vawlei hmun lawng acre 5000 a sok tiah an ka puh mi hi biachokvai le ka tuah mi hrimhrim a si lo tiah upatnak he kan theihter hna. Keimah cu pumpak hrim in kawl ram cozah nih 2012 ah siseh,2017 ah siseh hmunhma lawng upadi ah vawlei hmannak nawl a chuah mi hi Chin ramkulh ah hman lo ding in doh aa tim mi ka si. Hakha vawlei hmunhma kong ah Sipin nih a tawlrel ning zong hi zohthan ding le a herh ahcun tharchuah than ding ah aa tlaih mi ka si.Cun, Hakha khualipi ah vawlei hmunhma kong ah zeihmanh pehtlainak ka ngei bal lo, hmailei zong ah mizapi hnatlaknak tel lo in riantuan kaa tim lo.Hi bantuk thawngpang tete hi ramkhel ah a um lengmang khawh mi a si caah nan rak theihthiam cio naklai kan nawl han” tiah a chim chap.
Salai Van Chan Ceu hi 2020 Myanmar ram party tling democracy thimnak ah Hakha peng, CNLD party in Pyine Hluttaw No.1 ah a zuam ding mi a si tiah kan theih.
