February 29 asiloah Phiang Kum
By: Salai KB Thawng
Kum khat ah ni 365 kan ngei. Phiang kum (Leap Year asiloah Leap Day) ahcun kum khat ah ni 366 a um. Hihi Gregorian Calendar ning in a si. Phundang in kan chim ahcun kum 4 dan ah ni 1 te aa chap tinak a si. February hi a tlangpi in thla 12 lak ah a tawi bik mi thla a si i ni 28 lawng a um. Kum 4 dan ah ni 29 hi aa chap ve tawn. Phiang Kum kan ti lengmang mi cu 2000 kum in thawk usihlaw, 2000-2004, 2008, 2012, 2016, 2020, 2024…tibantuk kha Leap Year ti mi cu a si.
February 29 ah a chuak mi hna hi Mirang nih “a leapling,” “a leaper,” or “a leap-year baby,” tiin an auh tawn hna. Chuahni lawmhnak (Happy Birthday) tuah hi an ca ah aa laklawh tawn i February 28 le March 1 ah an tuahpiak tawn hna. February 29 a chuak mi hna lak minthang tam deuh hi Zungmawilei minung le Biaknaklei minung deuh an si, ti a si. Hlasakthiam (singer), lemcangthiam (actor/actress), thuamthilthiam (fashioner/designer) tibantuk minthang hi tam deuh an um.
February 29 cu nu nih pa kha helh hmasa, thitvaat ding in chimh (propose) tuah khawhnak ni a si. 1288 kum ah a pakhatnak bik nu nih pa thitvaat ding chimh le helhnak nawl cu Scotland ram nih phung an ser i an zulh hmasa bik. February 29 hi India ram Prime Minister hlun Morarji Desai chuah nithla a si. RC Pope Paul III, lemcangthiam le hlasakthiam minthang Dinah Shore tibantuk minthang chuah nithla a si.
February 29 (Phiang Kum) hi Nitlaklei ram ahcun kum dang hna nakin a lin deuh ngaingai. February thla in June thla tiang hi a lin khun i July in December thla tiang hi kum dang hna nakin a kik deuh ve. February in June thla tiang hi a linh khun ca ah mei ralrinnak zong an tuah tawn.
February 29 hi National Time Refund Day ti a si. Phundang cun, caan a hleihluat in hmannak ni ti khawh a si. Hi nicaan ah kaa nuam bik lai, tiah na ruah mi pakhatkhat tuah. Chungkhar sin ah nuam tein caan hman khawh i zuam. Midang ca ah thiltha pakhatkhat tuah khawh i zuam. Midang bawmhchanhnak ni ah hman khawh i zuam. Leng chuah in hmun pakhatkhat ah caan hman khawh a si.
Cun, February 29 hi USA ahcun Rare Disease Day an ti ve. February 29 ah hin zawtnak a tlawm deuh nakhnga sii-inn ah siseh, mizaw sin ah siseh, bawmhnak pek le cawnpiaknak tibantuk in caan an hman ve.
(Ref: www.mocomi.com, Wikipedia, Ranker.com, Gregorian Calendar, February 29 Quiz)
