Falam khuapi Cinmual sang, Tlanglo sang chung vawlei hmun hmun 247 ca ah minung 800 leeng nih an sok i, November 2 ah camcawhfung an zuhter hna tiah thawng kan theih.
Hi vawlei hmun pawl hi A,B,C tiin a man an then hna i A ca ah sing 20, B ca ah sing 10 le C ca ah sing nga tiin an then hna tiah kan theih.
Hi kong he pehtlai in Falam Sipin Chairman Pu Dar Lian Uk nih, “Atu sangthar samh mi chung in vawlei hmun hmun 247 pek ding timhlamh a si. November 2 hi camcawh fung zuhter an si. A cotu pawl hi fiang in cun kan chim kho rih lo. Hi chung ah Cozah riantuan inn hmun a ngei lomi, biaknak lei siseh, Cozah lei siseh pension a laa cang mi pawl hi camcawhfung zuhter loin Committee nih an pek hna,” tiah The Hakha Post ah a chim.
Pension a laa mi hna chung in Committee nih A hmun ah pek mi minung 14, B hmun ah pek mi minung 14, C hmun ah pek mi minung 9 le Pastor Pension in A le B ah minung pahnih an pek ve hna. Pension a la mi hna chung in hnawhthan mi hi A Line in minung 19, B Line ah minung 2, C Line in minung 8 hna an si tiah thawng kan theih.
Cun, Falam Penguk Zung Lutlai Pu Ca Awi nih, “A rak sok mi pawl hi Falam khuapi chung a ummi zong an um, cun khuate lei a ummi zong an um ve. A hmun tu hi cu Falam sii-inn lei meithat zung pawng Surbung Airport kalnak lam kam pawl ah an si,” tiah The Hakha Post ah a chim.
Camcawh fung zuuk i hmun a co mi poh nih ni 30 chung ah tangka rikhiahpiak ning in pek dih a si lai tiah kan theih.
