Covid-19 zawtnak ruangah mizapi chawlehnak le thinlung retheihnak tampi a um caah Cozah nih mizapi thathnemnak caah tiin mei man cu a rak awlh i, cu a awlh mi cu tu thla December thla dih ah aa lim cang lai, tiah kan theih.
Cozah nih mei kan hman mi man a kan awlh mi cu, thla khat ah Unit 150 man (Ks. 11550) le Meter box zohkhenh man 500 hi awlh a si. Mei kan hman mi man an kan awlh mi hmanh hi a rak tlawm te lo.
Mei man awlh mi kong he pehtlai in Electric Zung Lutlai pakhat nih, “Kan awlh mi hna hi a tam deuh cu innchung rawlchuan tikhinnak ca lawng a hmang mi hna hi an si. Chawlehthalnak ca ah tiin dawr a tuah mi hna hi cu kan awlh hna lo. Awlh a si mi hna zong hi Unit 1 in 150 tiang an hman mi, tangka fang in Ks. 11,550 hi awlh an si,” tiah The Hakha Post ah a chim.
Atu mei man awlh mi hna chung ahhin, Cozah zung le zung dangdang hna cu an i tel lo tiah theih a si.
Cun, “Mei man awlh mi chung ahhin Cozah zung le zung dangdang hna hi cu an i tel lo. A tam deuh hi cu inn ca ah hman mi mei pawl lawng hi awlh an si. Atu mei man awlh mi zong hi December thla chung in cun a caan a dih cang lai. Thanh than ding le thanh than lo ding hi cu biafiang a um rih lo,” tiah a cunglei Electric Zung Lutlai nih a chimchap.
Atu bantuk in Covid-19 zawtnak chungah mizapi an zaangdam nakding ca ah tiin Cozah nih mei man a awlh mi hi April thla in awlh hram rak thok a si i, atu December thla dih ah awlh caan aa lim cang ding a si, tiah kan theih.
Photo/ Hakha Electric Zung mei man an pek lio
