2020 kum Myanmar ram party tling democracy thimnak ah Chin Ramkulh chung in Hluttaw Palai, Independent telh in minung 210 aa zuam ding mi hna mee sawmnak ding kong he pehtlai in COVID-19 zawtnak a zual chin lengmang ca ah lungrethei in an um tiah kan theih.
Chin Ramkulh chung, 2020 kum party tling democracy thimnak ah ramkheel party 12 le Independent in aa zuam ding minung 17 an si i, COVID-19 zawtnak a zual chin lengmang ca ah mee sawm kal tik ah harnak zong an tong kho tiah Chin Ramkulh, Thimnak Zung Secretary Pu Lin Kyaw nih a chim.
Pu Lin Kyaw nih, “COVID-19 zawtnak hi zualhma lei a panh chin lengmang cang. Thimnak ni tiang hin COVID-19 hi a um rih ko lai tiah zumh a um. Ni khat hnu ni khat in zawtnak hi a karh chin lengmang ca ah Hluttaw Palai hna ca ah lungrethei ngai a si. Aruang cu a rauh hlan ah mee sawm khawhnak nawl zong pek an si cang lai. Zeitindah dingrep an tuahpiak hna lai ti chim awk a tha lo. Union Election Commission nih zeitik ahdah a ni caan hi a thanh lai ti zong a fiang rih lo. Cun, Ramkomh Ngandamnak le Zaanglek Zung nih zeibantuk dingrep dah a tuahpiak hna lai ti zong aa fiang rih lo. Kumdang nak cun an i harh deuh ko lai,” tiah The Hakha Post ah a chim.
Cun, kei ka ca ahcun COVID-19 hi tihphan ding a um tuk lo. Kei ka tihphan deuh mi hi cu ram a daih lonak le kahdohnak a chuah pah lengmang rih ca ah hihi ka tih deuh tiah Paletwa Peng, NLD in aa zuam ding mi le atu lio Chin Ramkulh, Sipin Minister Pu Soe Htet nih a chim.
Pu Soe Htet nih, “Kannih Paletwa Peng tu ahhin cun COVID-19 zawtnak nakin ral hi kan tih deuh. Mee sawm zong hi kal khawh ding le kal khawh lo ding timi hi fiang lak in chim a har. Aruang cu mizapi nih nan theih cio bangin Paletwa Peng chung cu Chin Ramkulh chung ah kahdohnak a chuah tam cemnak hmun a si ca ah a si. Zeitindah kan kal pi te lai ti hi lungrethei ngai a si ko,” tiah The Hakha Post ah a chim.
Peng kua umnak Chin Ramkulh chung ah mee hmun hmun 39 a um i cu chung ah Amyotha Hluttaw mee hmun hmun 12, Pyithu Hluttaw mee hmun hmun 18 le Ramkulh Hluttaw mee hmun hmun 9 a um.
Cun, CNLD party lei in Hakha Peng Ramkulh No.2 ah aa zuam ding Pu Siang Mang nih, “COVID-19 zawtnak hi a zual chin ca ah a liamcia thimnak lio pawl nakcun tampi kan i harh deuh ko lai. Aruang cu a liamcia ahkhan cun minung rikhiah a um lo. Atutan belte hi cu zawtnak nih a kan tlun hnawh tik ah a tam bik minung 30 lawng biaruah khawh an si lai i, harnak cu kan tong hrimhrim te ko lai,” tiah The Hakha Post ah a chim.
A liamcia kum 2015 lio party tling democracy thimnak ahkhan Chin Ramkulh chung in ramkheel party 13 chung in Hluttaw Palai minung 202 an rak i zuam i NLD party nih tlangcimh vawlei cimh in teinak a rak hmu.
