By : Parthlam
England ram catial thiam William Shakespeare nih “Chaw le va sungh hi sungh a si rih lo, ngandamnak sungh cu tlawmpal sungh a si, ziaza sungh cu sungh cikcek a si” a rak ti.
Covid-19 tlangrai zawtnak hi Kawl ram chung ah Laimi kan sin ah 2020 March 23 ah hmuh hmasa bik a rak si. April a zarh khatnak in Biakinn pumh khap kan si. Atu tiang zong Biakinn ah a bu in Pathian biak le thangthat khawh a si rih lo. Abu in Pathian thangthat khawh a si lo caah mino cheukhat cu caan tha ah la in khualeeng chuah le hawikom he i nuamh ni ah Zarhpi ni hi a hmang mi an um cang.Chungkhar cheukhat nulepa cu chungkhar pumhnak zong a tuah kho lo mi um a si tikah Pathian he i pehtlaihnak le Pathian thangthatnak ah thazaang a der mi tam ngai um a si cang. Fale zong nih Pathian tihzah bochannak le Biakinn tlaihchannak zor ngai khawh a si.
Mi cheukhat nulepa cu biakinn pumh nakin pumhlo hi a nuam deuh in a thei mi zong um a si. “Biakinn pumh ahcun kan pastorte thawngtha chim mi lawng kan thei peng. Atu cu kan duh mi thawngtha poh kan ngai kho cang,”a ti mi zong um a si. Atu lio dirhmun ning in cun member nih mah pastorte tlaihchannak zor ciahmah khawh a si. Hiti ning in kan kal peng ahcun pastorte thlahlawh pek awk um te lo zong a fawi te. Biakinn ah aa pum mi um lo in biakinn khar le biakinn a zuar mi Khrihfabu zong um te khawh a si. Pastorte nih biakinn pumh khawh lio nakin member sin ah caan tam deuh pek le biatak chuah chin a herh ko lai.
Covid-19 tlangrai ruang ah kan fale kum khat chung sianginn an kai kho ti lo. Mi cheukhat fale cu cuza loin nupi thi le va ngei zong an um cang. Nungak le tlanval a thiam mi zong an um cang caah sianginn hon khawh hmanh khi va si te sehlaw sianginn kai a duh tilo mi fanau tampi an um ding cu a fiang. Fimcawnnak lei ah kan chambau i cathiam sang fanau an tlawm ahcun mi phundang kut tang peng ah kan um lai i kan ram sersiamtu le bochan mi an tlawm chin lengmang lai ti a fiang mi a si.Atu lio fanau cheukhat cu leengvaak tung loin inn chung ah phone lawng a dek i auh hmanh ah mi a hawi zokzok ti lo mi le rian fial khawh lo mi zong an um cang.
Cucaah atu lio kan chan le sining hngal in hringtu nulepa le biaknak le vawlei lei hruaitu hna nih fanau kilkawi le thazaang pek, Khrihfabu member kilkawi le vehvat, fanaule fimcawn thazaang pek biatak chuah deuh a herh caan a si. Covid tlangrai ruang ah kan rak si tawn mi lungput le ziaza kan thlau lo ding a biapi tuk. Kan ziaza aa rawk ahcun rawk taktak a si lai ca ah aa rawk hlan ah remh i zuam hna usih. Lungput ziaza sung cu sung cikcek a si.
