Atulio hi Rakhine ram ah fak tuk le rianrang tuk in COVID-19 a karh tik ah kanmah cio zong daithlang hlah usih, kanmah Cozah lei zong nih biatak deuh in kan rengh cang lai, tiah Minister Pu Pau Lun Min Thang nih September 2 ah a chim.
“COVID-19 kong ah zaanghleicawi phu (volunteer) an si zong ah kanmah Cozah lei kan si zong ah, cun, mizapi kan si zong ah kan daithlan awk a si lo. Cun, Case No. 1 kha kanmah Chinmi bak a si tik ah kha liote khan kan i ralring peng ko. Asinain, daithlan sual a fawi mi a si. Cun, India lei ramri kutka (gate) pawl le Rakhine-Paletwa luhnak kutka hrawng zong ralring tein kan tuan khawh ahcun thinphan tuk ding zong a si lem hnga lo. Cun, dawr hngaktu nih siseh, dawr thil caw mi nih siseh, mask i hup loin thil zuar lo ding le thil cawk lo ding, tibantuk tiang kan zulh khawh a herh,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
COVID-19 a zorlei a panh rua ti lio ah September 2 zinglei tiang ah Myanmar ramchung COVID-19 mizaw 938 an si manh. Cu ruang ah chikhatte sianginn hon mi zong khar than dih a si. 2020 kum thimnak zong hnahnawhnak a pek lai, tiah zumh a si.
