Chin National League For Democracy (CNLD) nih Cozah nih a tlaih mi Radio in meepek sawmnak tuah an timh mi cu Union Election Commission nih a duh lomi kong ah CNLD party lei nih duhlonak cathanh an chuah ve tiah theih a si.
CNLD Policy le tuan an i timh mi chung ah paragraph 7, 1, 2, 3 le 4 hna hi phung le lam he aa kalh mi a si ca ah UEC nih, tuah lo ding in September 19 ahkhan thawngthanh thannak a tuah hna tiah cathanh an chuah mi chung ah aa tel.
Hi kong he pehtlai in CNLD General Secretary Salai Ceu Bik Thawng nih, “Ramkheel party kan si bantuk in kan policy hi a bik in chim kan i tim. Kan chim mi chung in tampi zong an kan hnawhpiak. A bik in chim kan timh mi hi Federal kong a si. Tam tuk a kan hnawhpiak ca ah chim ti lo lawlaw dingin bia chahnak kan ngei ve. Chim kan i timh mi chung ahhin kawl hi Ramkulh pakhat in um ve seh ti aa tel ca ah an kan kham mi zong hi a si ko lai tiah zumh a si,” tiah The Hakha Post ah a chim.
UEC lei nih ramkheel party hna i Policy le tuan an i timh mi pawl Radio in chim ding mi kong ah People’s Party (PP) le a dang party hna zong chim ti lo dingin biachahnak an ngei hna tiah theih a si.
Cun, Salai Ceu Bik Thawng nih, “MRTV ah chim ding hi a biapi ngaingai. MRTV hi kan policy le kan i timh mi kan mumal pawl rammi hna sin chim ding in hmun tha ngai cu a si. Asinain atu ahcun a kan cohlanpiak lo tik ah ruah ding a tam ngai. Hi nih a langhter mi cu NLD Cozah tang ah atu UEC Chairman hi anmah nih an thimmi le an khinh mi a si. NLD Cozah chung ah ramkheel party pawl temtawnnak le Democracy kan vo an buarmi le an kan khammi hi a tam deuh. Kum 2010 le 2015 lio zong ah kan rak tuah ko. UEC lei nih a kan kham mi zong a um ko nain atu bantuk hi cu a si lo. NLD nih a kan kham mi hi a zualhma deuh hlah maw ti kan ruah ca ah kan lung a tling hrimhrim lo. An lungput hrim ah kawl Cozah nih tlangcung mi hna kan co ding coter a kan duh lo le a kan doh ti hi hmuh khawh a si,” tiah a chimchap.
Chin National League For Democracy (CNLD) party in 2020 November 8 ah tuah ding Myanmar ram thimnak ah Chin Ramkulh chung Hluttaw hmun 36, Magwe le Rakhine lei ah Hluttaw hmun 21, dihlak fonh hmun 57 ah aa zuam ding party an si.
