2020 kum Christmas le kumthar ah minung 30 lawng in tuah ding le biakinn ah i pumh ding in 2020 December 8 Chin Ramkulh Cozah Cabinet Meeting ah bia khiahnak an ngei tiah theih a si.
2020 December 3 ahkhan Ramkomh Ngandamnak le Zaanglek Zung nih Christmas le kumthar ah minung 50 tiang pumh khawh a si tiah cathanh an rak chuah nain, Hakha peng, Siman Khanhkhuaihmu Committee nih 2020 December 7 ah minung 30 tiang lawng a ngah i, Christmas le kumthar tuah aa tim mi poh nih 2020 December 10 hi a hnu cem chia in rian ngeitu hna sin ah ca chiah ding tiah cathanh an chuah ve.
Hi kong he pehtlai in Chin Ramkulh Cozah Chimphuannak Nawlngeitu Minister Pu Soe Htet nih, “Christmas tuah ding kong he pehtlai in 2020 December 8 ah Cabinet meeting kan thu. A hlan i minung 50 tiang pumh a ngah timi zong kha, kanmah kan i runvennak ca ah tiin minung 30 ah thumh than a si. Hihi a hnu bik zong a si ko lai, hinak tlawm deuh ding in cun thumh ding hi chimcaihnak a um rih lo. Biakinn i pumh tik zong ah, minung 30 in i chan ding in bia i ruahnak kan ngei. Cun, kanmah Cozah lei zong Christmas tuah kan i tim. Kanmah lei kan tuah tik zong ah minung 30 in kan i chaang lai i, rawldumnak kan ngei lai,” tiah The Hakha Post ah a chim.
2020 December 7 i cathanh an chuah mi chung ah Christmas le kumthar tuah aa tim mi poh nih 2020 December 10 hi a hnu cem chia in rian ngeitu hna sin ah ca chiah ding tiah aa tel.
Khrihfabu lei nih ca chiah ding kong he pehtlai in, Pu Soe Htet nih, “Khrihfabu lei nih ca chiah ding hi 2020 December 10 a hnu bik a si. Ca kan chiahter mi hna zong hi, Ramkomh Ngandamnak Zung lei ah kuat than le chimh an hauh ca ah a si. Cun, ca an chiah tik zong ah khrihfabu pakhat cio nih chiah ding ti theng a si lo. Bianabia ah, HCMF i Secretary Rev. Dr. Stephen Lian Hup Ling nih anmah khrihfabu ca lawng si loin, HCMF chung i a ummi khrihfabu kip ca ah ca a tial a si ahcun, a ngah. Rian ngei pakhat nih khrihfabu kip aiawh in a tuah a si cun cohlan tuk a si ko,” tiah The Hakha Post ah a chimchap.
Christmas hi Hakha le Thantlang Khrihfabu a tam deuh cu sa i hleh in tuah an i tim tiah theih a si.
