Chinland Football Club nih Chinland for Paletwa ti minput in a voi hnihnak Paletwa hartong kan unau chungkhar 67 cu inn khat ah tangka Ks. 100,000 cio bawmhnak cu September 4 ah an pek than hna, tiah kan theih.
“Pathian lamhruainak le bawmchantu hna thawng in a voi hnihnak bawmhnak kan pek khawh hna. Tutan hi thilri le facang si loin, innchungkhar 67 kha inn khat ah tangka Ks. 100,000 cio in kan bawmh hna. Atu bantuk in ramchung ramleng in kan unau hna ca ah kut a samhtu nan dihlak cung ah kan i lawm tuk. Pathian nih nan riantuannak cio ah thluachuah in pe chin ko hna seh, tiah thlaza kan in campiak hna. Atu hi a voi hnihnak a si cang. Hmailei ah a voi thumnak zong bawmhnak pek than kan i tim,” tiah Believers Church General Secretary le Chinland FC President Rev. NC Thawng Tha Thang nih The Hakha Post ah a chim.
Atu bantuk bawmhchanhnak ah hin a fianghlang mi (transparency) a um khawh nakhnga tiin phu an ser. Cu hna cu; Rev. Tet Paing Soe (Paletwa Evangelical Christian Alliance), Rev. Htein Bay (Paletwa Christian Council), Rev. Ngwe Thein (Anglican Church Pastor), Rev. Lawm Cung Ceu (Believers Church Pastor), le Saya Si Hmung (Believers Church Pastor) hna an si, Cu hna nih chungkhar a harsa deuh mi an thim hna i an pek hna, tiah kan theih.
