Pyithaungsu thimnak Commission nih October 27 ah a chuah mi a ra lai mi November 8 ah tuah ding mi thimnak General Election ah Chin ramkulh, Palettwa peng um khuatekomh 95 le sang 7 umnak chungah khuatekomh pakhat le sang 7 lawngah thimnak tuah khawh a si lai, tiah thawng kan theih.
Thimnak tuah khawh nakding hmun hna cu Shinletwa khuatekomh pakhat le, Palettwa khuapi chung, Ginwah sang, Myoma sang, Yeihka sang, Yuama sang pawl le Sami khuapi chungah No. 1 sang, No. 2 sang le No. 3 sang pawl an i tel, tiah kan theih.
Hi kongah Frontier Institute volunteer Pu Thang Deih Thang nih “Thimnak kong cu Pyithaungsu Commission nih a chuah mi a si. A ruang cu thimnak tuah ding ah ral a tho, a him lo tiah a hmuh caah tuah loding in a chiah mi a si. Chin ramkulh ahcun Palettwa lawng a si. Palettwa lawng a si lo, Rakhine, Kachin le Shan hmun tampi ah thimnak tuah lo ding an tinak a um ko”.
Cucaah hi kong hi social media facebook cung ah ramkhel lei mifim thiam pawl zong nih an soi tam ngai cang. “Hmun cheukhat ahcun ral zong a tho lo nain thimnak tuah an tim lo, hmun cheukhat ahcun ral a tho taktak ko. Tlangcung party an thawn deuh nak hmun poh kha ral a thawh caah a him lo tiin an ti, cucaah thimnak tuah ding an phihnak a si. Tachunh nak ah Rakhine le Shan, Shan ahcun SNLD an thawn caah teinak an hmuhnak hmun poh kha cu thimnak tuah khawh loding in an chiah ko hna. A tlangpi cu thimnak ah NLD nih a sungh nakding hmun deuh kha cu ral a thawh caah a him lo timi kha hrambunh in hi bantuk in ca an chuahnak hi a si, tiah an soi lengmang nak hna hi a si,” tiah The Hakha Post ah a chim.
Hi cathanh hi UEC nih a chuah mi kha mizapi nih fiang deuh in an theih khawh deuh nakding caah Frontier nih Data Visualization in fiang deuh in a langhter than mi a si, tiah kan theih.
