Chin Ramkulh chung COVID-19 zawtnak kong he pehtlai in Facility Quarantine Center hmun 20 leeng a um i Facility Quarantine in minung 600 leeng an um nain volunteer a tuan mi an tlawm tiah theih a si.
Pengkip i volunteer an tlawmnak a ruang bik cu, a caan a sau cang lawng si loin Cozah lei zong nih thazaang a pek tuk hna lo ca ah an tlawm hi a si bik ko tiah Falam Volunteer Leader Saya Timmy nih a chim.
“Kannih Falam hi COVID-19 zawtnak a nawl khatnak ahkhan cun zaanghlei cawi (Volunteer) tuan ding in min aa pe mi minung 45 hrawng an si. A nawl hnihnak a vun phak tik ah minung zong an zor ngaingai i 20 hrawng lawng kan taang. An zornak bik hi cu, a nicaan zong a sau cang, thla riat leeng a si. Cun, Cozah lei rian ngei hna zong nih thazaang peknak, dirpinak a um tuk lo tik ah an zor khunnak hi a si,” tiah Saya Timmy nih The Hakha Post ah a chim.
COVID-19 zawtnak a chuahka in nihin tiang Falam khuapi ah Facility Quarantine Center ah a ummi minung 800 leeng an si i, atu ah minung 11 erhkhumh an si. Cun, COVID-19 zawtnak in sii-inn ah chiah lio mi minung pakhat a si.
Cun, Mindat khuapi chung volunteer kong he pehtlai in Sayama Novem Htwe nih, “COVID-19 a chuah in volunteer kan tuan i nihin tiang ah thla kua leeng a si cang. A nawl khatnak lio ahkhan cun minung kan tam taktak. A nawl hnihnak nih a vun kan phak i kan zor deuhdeuh. Atu ahcun volunteer kan um lo ti awk a si cang. Aruang cu Cozah lei nih thazaang peknak le dirpinak a um lo lawng si loin, zawtnak a karh pah ca ah nulepa hna zong nih an sianh ti hna lo,” tiah The Hakha Post ah a chim.
Myanmar ram chung ah COVID-19 zawtnak kong he pehtlai in Facility Quarantine Center hi hmun 6300 leeng a um i, hi chung ah erhkhumh minung 70,000 fai an si cang.
Hakha khuachung i volunteer hna kong he pehtlai in Dr. Cungpi nih, “Hakha khuachung ah COVID-19 zawtnak a chuah hnu volunteer kan dir. A hramthok ahcun volunteer hi kan rak tam nain, a caan a vun rauh deuh tik ah an zor thluahmah. Atu ahcun minung 39 lawng an taang cang. Ngandamnak le Cozah riantuan hna zong riantuan an thiam deuh cang ca ah an zor zong a si kho,” tiah The Hakha Post ah a chim.
Chin Ramkulh chung COVID-19 zawtnak in a zaw mi minung 150 an um cang tiah theih a si.
Photo/ Falam COVID-19 volunteer
