Myanmar ram pumpi huap, a voi hnihnak mee cazin taar cu 2020 October 1 in an thok i, Chin Ramkulh chung ah mee a thla ding minung 9,000 leeng an zor tiah theih a si.
2020 kum thimnak ca ah a voi khatnak mee cazin taarnak ah Chin Ramkulh chung in mee a thla kho ding minung 342,341 an si nain atu a voi hnihnak mee cazin an taar mi chung ah minung 332,698 lawng an si i, a voi khat lio nakin minung 9,439 an zor.
Chin Ramkulh Thimnak Zung Lutlai Pu Uk Nawl nih, “A voi khatnak mee cazin kan taarnak ahkhan pungsan 3 in a sok than mi an tam. Cun, Door to Door in inn khat hnu inn khat in kan kal i zohfelnak kan tuah mi chung zong ah a karh mi a um. Pungsan 4 zong in an rak hnawh than mi zong a um ve,” tiah The Hakha Post ah a chim.
2020 kum Myanmar ram party tling Democracy thimnak ca ah a voi hnihnak mee cazin hi ni 14 chung taar a si lai i, mee a thla kho ding dirhmun a si ko nain a min aa tel lo mi an um sual ahcun mee cazin zong zoh philh lo ding in Pu Uk Nawl nih a chimchap.
Tutan thimnak ca ah mee thla kho ding in ramleeng phan Chinmi chung in minung 253 nih pungsan 15 in an sok. Cun, a voi khatnak mee a thla ding zong hi Chin Ramkulh chung ah minung 4,200 leeng an um tiah Chin Ramkulh Thimnak Zung lei in theih a si.
Pengkomh 4 le Peng 9 in ser mi Chin Ramkulh chung, 2020 thimnak ca ah mee zung hmun 1114 ah hon an timh.
