Mongolian phun Chin miphun pawl cu AD 1500 hrawng ah hin Lailun lungkua pawng lungṭial hmun ah kan hun phan. Cu ti cun Lairam khua vialte hna hi khua ah an tlak dih.
Mirang Cozah nih Chinram cu 1890 kum in tei hram a thok i 1896 kum ah a uk dih.
Pu Ro Thang cu 1931 kum in Haka khua ah Raise khan chun in mirang Cozah rian a ṭuan. Hi lio Haka cu a tu Hakha peng, Thantlang peng le Matupi peng dihlak hna hi an si. 1937 kum ah Kawlram cu India Empire in a ṭhen tik ah Lairam Ram – uk bawi ukning phung kha a thar in an tuah. Cu uk ning phung cu Ram – uk bawi (Feudalism) sin ah michia (Mizapi) nih Sakhua, Rawlrel pek le hranhram in rian ṭuanpiak a si. Cu phungthar nih cun Pu Ro Thang zong a nenh chih ve tik ah Ram – uk bawi uk nak phung cu a duh hrimhrim lo caah a doh hna. Cu cu Mirang Cozah nih an theih i December ni (12) 1943 kum ah Tlangpi khua ah an tlaih i India ram ah thong an thlak. January (1) 1945 kumah thong inn in an chuah.
Lairam a rak phak in mirang Cozah a doh ṭhan hna caah Palik nih an tlaih i Haka thonginn ah thla khat hrawng an hren. Thonginn a chuah hnu 1946 kum September thla ah Pu Ro Thang hruai nak in Pengtlang (3) ah Upa(30) tluk hna kha Farrawn khua ah Mirang Cozah doh ding in meeting a tuah pi hna.
1946 kum October thla ah Pu Ro Thang hruai nak in Haka peng Thlantlang khua le Pengtlang (5) hna kha Hriangkhan khua ah pumh nak (Conference) ngan pi an rak tuah. A khua in khua (60) an tlung i minung (300) leng kai an si. Pu Ro Thang nih mirang Cozah nih uk rih ding a ṭhat lo nak le Ram – uk bawi phung a ṭhat lo nak a chimh dih hna in a tanglei upa hna hi Conference Office Bearer ah an thim hna.
- Pu Mang Dum (Saikah) Chairman
- Jemedar Khen Sang (Tikir) Vice Chairman
- Pu Len Dun (Vanzang) Secretary
- Pu Ro Thang (Tlangpi) Joint Secretary
- Pu Thla Khar (Thantlang) Treaserer
Hriangkhan khua a pum mi vialte hna nih cun a tanglei bantuk in bia an chah.
- Te chin Fapar Roco chin uk nak kan duh ti lo. Zapi thim mi bawi nih kan uk cang hna seh.
- Zapi thim mi a kan uk tu bawi cu Cozah nih thlahlawh pe cang hna seh.
- Mi- uk le Khuabawi kan pek tawn mi atang lei Khuachiah, Rawlrel hna hi pit dih cang hna seh.
- Kum tin in inn khat ah rawl phio khat kan pek tawn mi Khuachiah, Rawlrel.
- Sathah le Sakah tik paoh ah saphei kan pek tawn mi sakhua.
- Kum chiar in a lo kan thlawh piak tawn mi lo hlawh chiah.
- Man pek lo in kan sak piak tawn mi hna inn – chiah hlawh.
- Khual a tlawn tikah a herh zat in Kuli kan phorh piak tawn mi chiah hlawh.
- Zu a duh tik ah a duh paoh in a kholh tawn mi zuphawi chiah hlawh.
- Khual a tlawn tik ah ar, arti, ngacar, sapherh le fang a kan kholh tawn michiah.
- Cozah rianṭuan pawl ei awk ah Kawlram ah ration kan phorh piak ti hna lai lo. An mah nih an i phorhkhawh lo ah cun Kuli phal hna sehlaw Kuli hlawh a duh mi nih phor hna seh.
- Cozah rianṭuan hna caah thing kan ong ti lai lo. An mah nih an i hlam khawh lo ah cun a zuartu sin ah caw ko hna seh.
2 A cung lei bia chah nak vialte hna cu Pu Ro Thang nih a ṭial dih in Office Bearers dih lak nih an min an thut dih hnu ah Hakha Vuanthok sin ah pakhat, Falam Zipeng sinah pakhat an pek hna. Pu Len Dun sin ah pakhat an chiah ve.
Hriangkhan khua pumh nak bia chah nak bantuk in Vanzang tlang pawl nih Kuli phorh an duh lo caah a tanglei an upa pasarih hna hi Vuanthok Hay – Neave nih Haka thong inn ah a thlak hna.
- Pu Len Dun (Vanzang)
- Pu Kap Luai (Vanzang)
- Pu Ceih Hnin (Lungding)
- Pu Kap Lian (Farrawn)
- Pu Hrang Dawn (Tlangpi)
- Pu Rual To (Tlanglo)
- Pu Thial Cin (Tlanglo)
Pu Ro Thang le Vanzang tlang upa pawl nih Falam Zipeng Thien Maung sin ah a zu ankhan, Zipeng nih an bia a ceih lio hna ah Thlantlang khua minung le Vanzang tlang minung hna nih duh lo nak an langhter i an au hnawhhna. Cu caah District Council nih cun Rangoon Interrim Government sin ah Laimi nih Kuli phorh an duh ti lo zeitin dah kan tuah hna lai tiah thirhri an hei tuk. Rangoon Governor zung ah a thaizing ah an leh colh hna i “Duh na loin Kuli phorhter” (Forced Labour and Forced Porter) a dih cang, rak ṭuanter ti hna hlah uh tiah an hun ti hna. Michia pawl vialte nih cun Kan tei cang! Kan tei cang! tiah thanuam ngai in an au.
Pu Ro Thang nih michia pawl vialte hna kha nan khua nan tluntikah a hohmanh nih Ram-uk bawi le Khuabawi pawl hna kha Khuachiah, Rawlrel vapeti hna hlah uh. Cun nan khua chirchan khua vialte hna zong va chim dih hna uh tiah a cah ta dih hna. Laimi michia vialte nih Ram – uk bawi le Khuabawi hna kha Khuachiah, Rawlrel an pek duh ti hna lo caah Mi – uk le michia hna kar ah a khua kip tein hin hna hnawh buai bai nak Lairam ah hin a um cang. Hi tiin hna hnok buaibai nak an bia cu Falam Zipeng sin ah a phanṭhan. Zipeng nih cun Rangoon khua Cozah zung ah Lairam buaibainak kong cu ca in a ṭial i thawng a hei thanh hna. Cu caah Kawlram Cozah nih Laimizapi nih an duh mi taktak uk nak phungkha hlat hlai piak ding ah (Inquiry Commission) pakhat a rak tuah. Cu Commission ah a tel mi hna cu.
- Pu Vum Thu Maung Commission Chairman
- Mang Tung Nung Secretary
- Pu That Hlaing Member
- President Sao Shwe Thaike Observer hna an si
Commission hna nih cun Laimi dih lak in Falam khualipi ah an rak kawh hna i minung (6000) deng pumh nak ah cun an rak kai kho. Pumh nak ah cun minung (5000) renglo nih Ram – uk bawi uk nak phung cu kan duh hrimhrim ti lo tiah mee an rak tlak. Minung(17) lawnglawng nih Ram – uk bawi phung hmun rih ko seh tiah an ti ve. Laimi zapi nih Democracy uk nak an i thim. Cu an bia khiah ni February (20) ni cu Chin Affair Council nih “Chin Miphunpi Ni” (Chin National Day) tiin min an sak i kum fatin conglawmhnak puai an tuah.
Ref : Pu Ro Thang le Lairam tuanbia
: C. Biak Kam Chin Miphun Ni
A ṭial tu /Pu Neih Ung
