Kan doh ding ral tampi lak ah tawi tein pahnih te hi ka hun langhter lai:
Pakhatnak: Kumtlinglo nupa sualnak (adolecent/teenanger and sexual relationship)
“Vawlei cung huap in zoh tik ah kumzabu 21 hi nupa sualnak (sexual relationship) ah ruru hraanghraang in kan um, kan karh.
Kumtlinglo (kum 12-17 kar) nih sualnak a tuah mi hi: India, America, Pakistan, Korea, Sweden le Africa ah hin an tam bik,” tiah Times Megazine nih a rak langhter bal (2012). Cun “Kum 12 cung kumtlinglo in nupa sualnak a tuah mi hi buaktlak in 35% an si,” tiah an langhter. Cucu vawleicung huap in a si. Peruvian miphun a si mi, Linna Medina cu kum nga a si bak ah fa a ngei. Hringtu a pa nih a tlaihhrem i a sualpi ca ah a si (Thinthang, March 2015 ah fiang tein a konglam ka rak tial bal). Amah Medina lawng si lo, kum ruk kum sarih kum riat tibantuk in fa a ngei mi tam taktak an um. (Ref: Wikipedia)
Cun Chinmi zong kan i buahneh ve rua. Salai vei nih cun, “Khuapi nu hi a hlan ahcun tih an nung, atu ahcun khuate nu tih an nung deuh. Tangriat a kai cang mi (kum 14 a cunglei) cu an thianghlim ti lo,” tiah a ka chimh. Hi bia hi zumh har ngai nain zeimawzat cu an si taktak kho ko. Ngandamnak mit in hun zoh tu ahcun “Kum kul a tling cang mi nu/pa nih nupa sualnak a tuah mi le a tuah lo mi hna an ngandamnak cu aa dang deuh. (Ref: Sex Education)
“Nupa sualnak hi thla khat ah voi khat tal cu a tuah awk a si,” tiah Zondervan Erick nih Premarital Sex and Health cauk ah a rak tial. A tlaangpi in char ahcun kumtlinglo in a sual mi hna cu, “Nau-inn zawtnak, cencer, hnuk cencer an ngei deuh,” tiah siibawi thiamsang nih an chim. Lai mino a bik in khuate nih, nulepa ih hnu tapchak le ramtang tehna hi kan i ziak tuk awk a si lo. Khuapi khuasa mino nih a kikam le hotel te hna kan i ziak tuk awk a si lo. Kumtlinglo nupa sualnak nih kum zabu 21 tiluang sin ah a kan fenh lo ding a biapi tuk hringhran.
Pahnihnak: Ral chiat zawtnak le Myanmar ram ramkheel (Terror-striken and political view of Burma)
Myanmar ram cu ralkap cozah nih kum 63 hualham thalolak in a kan uk. Meithal hmurpaar cu kan tih cio fam. Chuih le lamh ding men kan rak si taktak. Nu paw chung in kan i chuahpi mi covo kan rak ngeih loning, cu nih cun kan thisen ah thinphanthlalaunak, zaam duhnak thinlung a kan ngeihter. Daihnak duhdim a um khawh lo ca ah raalzaam dirhmun kan phan. UN nih record a tuah ning ah “Chin miphun hi vawlei cung ah a panganak ralzaam a tam bik an si,” tiah a tial (2012).
Chinmi milurel zoh tuah usih. Myanmar ram cozah nih March 30 in April 10 (2014) tiang ah milurelnak a tuah. Chinram cu milu tlawm bik in 478690 lawng kan si. Sing nga hmanh kan tling lo ai. Buaktlak in tuak tik ah ramleng ah hin Chinmi hi sing khat le thong sawmthum (130000) hrawng an phan cang, 30% hi ramleng ah kan zaam i Chinram kan chuahtaak. 2009-10 kum ah UNDP le Planning Department nih “Myanmar ram chung ah Chinram cu sifak bik a si,” tiah record an rak chiah (Ref: Internet). Rakhine hi sifak bik pahnihnak an si ve. Zoh hmanh, Chinram hi 73.3% in sifak bik le Rakhine kha 43.5% an si. Chinram hi buaktlak in tuak ahcun sifak bik kan si lai lo, kan si hmanh ah 73.3%, 43.5% cu aa thlau tuk. A si kho lo. Hihi an kan nehsawh tuk ca ah ningcang lo in thil an tuah lengmang.
Chim duh mi cu kan covo a tlawm ning. Chinram ah vailam tung 13, (U Thein Sein Cozah kai hnu ah pali, an phur mi he) an phur cang (Ref: CHRO). An milem le pura tu cu hmunkip ah toh an timh. Hmun rolh in an toh mi zong an um. An thilti ning hi IS tapung an lo. Myanmar ram chung ah Chinram lawng hi vanlawng bual a ngei lo mi kan si. Atu cu vanlawng bual kan ngei cang lai. Pehtlaihnak lamsul a that lo ning, biaknak, nunphung le kan caholh ah duhdimnak a um lo ning.
Myanmar ralkap thluak hi zoh ziar hmanh u, 2014 Novemer 19 lio ah Kachin Independence Army (KIA) an raltuk cawnnak camp ah ralbawi a si hnga ding mi minung 23 an nawn hna. Kawl ralkap nih nu an tlaihhnreem hna i an thahbeh mi tehna, ningcang lo in an thah hna i taza an cuai hna zong ah tei khawh an si lo ning tehna. Hi thil hna zoh tik ah 1962 lio U Ne Win nih nawlngeihnak a laak bantuk khan, “Tlangcungmi hi an thin lin sehlaw ram a buai kan ti lai i a-na kan laak than te lai,” ti hna khi an saduhthah sisehlaw hngalh lo a si. Zeicatiah remdaihnak, kahdaihnak ser in min an thut len bu ah cun pei an meithal cu an i bochan peng ko hi, an kan dir-onh peng ko hi. Atu tu ahcun Democracy chan kan hung phan i fak tuk in kan zawt lo ding a biapi. Federal State belte fawizaang cun kan hmu kho rih lai lo, a fiang ko. Asinain kan philh lo ding cu ralkap thisen a nung rih i ralkap nih meithal an ngeih zungzal ti hi philh bak lo ding a si.
A cunglei ka langhter duhnak a chan cu ral chiat tuk awk kan si ti lo ti hi a si. Democracy le Federal phung cu a zatawk kan hngalh pah cio ko ca ah raltha tein dir ngam a hau. Kan duh lo, cucu kan duh, khakha kan duh lo tiah raltha tein mizapi, a bik in mino nih kan dir ngam a herh cang. Ral that hi himnak a rak si tawn. Cun, ka biahram ah ka langhter bang kumtlinglo nupa sualnak hi mino nih kan doh ding le kan i ralrin ding a si ban tuk in nulepa zong nih felfai deuh in kan zeet ding thil pakhat a si. Salai KB. Thawng
