Merem thiam loin thinlung a caam mi samh lo ahcun zei can dah merem loin ka um lai ti phan ah hi capar hi ka vun tial. Tutan ka capar hi a duh poh nih al hna sehlaw hmaitonh tein i ceihmainak ngeih i a dik mi tuanbia tial usih ti ka duh ruang ah a si.
Chin kum thar THO kan ti mi hi Chinram kan phanh hnu i an phuah cop mi a si lo. Chin miphun a si mi poh nih an phaknak hmun poh ah an philh lo mi le an thinlung ah aa tial mi puai a si kan ti khawh. Hakha nih Lai Tho, Falam nih Faang-er, Tedim nih Khuado, Matu nih Thado an ti. Khuate deuh ah,Chuncung nih Kuut, Tiphul nih Hau an ti. Kan min sak ning i dang lengluang hmanhsehlaw, a hram aa khat mi hrat cu a par le a tlai cu aa khat dih. A hram khawika in dah aa thawk ti hi tuak le hngalh caan a cu cang.
Chin miphun kan hrampi cu Pathian a si i, kan pupa thinlung ah zungzal hmun dingin a hram a bunh i an philh khawh lo mi puai a si ko nain caan saupi a liam hnu ah vawlei mifim le nawlngeitu hna nih anmah siarem ning zoh in a ni le caan hna rak hman le kalpi a si ruang ah aa khat ko mi puai kha, aa dang mi puai bantuk in kan miphun nih hman le tuah a si cang. Hi nih a langhter mi cu Chin miphun hi lungrualnak kan ngeih lonak a langhter. Miphun dang sin ah sang ve usih ti kan duh ahcun, mah miphun hi kan sining kan i fian hmasa i lungrualnak kan ngeih hnu lawng ah mi kan tei khawh hna lai.
Chin nunphung ah, THO le – Hluk hla, chiat ni – that ni, phung le phai kan ngeih mi vialte hi, Chinram kan phanh hnu ah hei phuah cawp mi men an si lo. Pathian nih Bible ah a ni caan le phungphai zong chiahpiak cia kan si. THO le Hluk hla puai hngalh na duh ahcun, Rev. Dr. Rual Uk tial mi Bible, Lev 23; Num 29; Deu 16 kha zeidang ruat loin Chin nunphung na theih tawk te kha ruat bu le thlacam bu in rel law na fiang pah ko lai. Tleicia Zipeng Ngun To nih “Chin kan nunphung hi ka rian he zong aa pehtlai. Theih le hngalh ka duh ca ah kaa zuam nain, khawika in aa thok ti hi ka hngal kho lo. Khrihfa ka si hnu Bible ka rel hnu ceo in aa thawknak hi ka fiang” a rak ti.
Salen khuami Pu Sa Thang, Hakha ah a rak kir than mi zong nih “Chinmi kan nunphung hi Bible ah a rak i tial dih ko. Kan hram cu Bible hi a rak si ko” a ti ve. Cucaah zeibantuk chan ti khi va luang lengmang hmanhsehlaw kannih Chinmi kan hrampi cu Bible chung bia a si i, chim thiam le nawlngeihnak zong nih a phuar khawh lo mi nunphung a ngeitu kan si. Kan Chin min i hman zau in ramkheel pawl zong nih nanmah party bawi nak ah kan hmanpiak hlah uh. Kannih Chinmi kan nunphung hi dingthlu lairel kan biak Pathian nih a kan serpiak mi Kum thar THO a si. Kan zate in kan kum thar THO ah hin ruah ning thar, thinlung thar, nunning thar he hmang cio ding in kan sawm hna.
By : Pu Rual Ceu. Hakha, Khuathar
(Biakilh: The Hakha Post ah hmuhning capar hi, The Hakha Post dirhmun an si lo. Catialtu dirhmun a si)
