2020 kum Myanmar ram party tling Democracy thimnak ah Thantlang Peng Ramkulh Hluttaw No.1 in aa zuam ding Pi Chin Chin Pek Thang mee pek ding ah Thantlang Peng khua cheukhat ah kal in mee pe uh tiah a forhfial hna timi hi lih a si, zeihmanh keimah he aa pehtlai lo tiah CNF/A ralbawi Pu Solomon Thang Ding nih a chim.
Media ah an tial mi kong he pehtlai in Pu Solomon nih, “Hi an tial mi hi lih a si. Keimah lei in zeihmanh cawlcanghnak le kaptanh mi ka ngei lo. Chin Chin Pek Thang hi CNF/A camp ah a rak tlung i, bawmhnak a kan pek. Bawmhnak an kan pek ruang ah kanmah lei minung zong Chin Chin Pek Thang hi tutan ah mee nan pek hrimhrim lai ti chimh le tuanvo pek pakhat hmanh a um lo, lih an tial mi le mi an purhdah sawh mi a si,” tiah The Hakha Post ah a chim.
Hi kong he pehtlai in CNP Party in Thantlang Peng Ramkulh Hluttaw No.1 ah aa zuam ding Pu Lal Maung Cung zong nih a tanglei bantuk in fianternak a tuah .
“Hi kong ah Media cheukhat nih an tial mi hi a dik lo mi a si. Media ah a langh le cangka in Pu Solomon phone ka chawnh colh i, hi an tial mi hi a dik lo mi a si. Hi bia a chuak mi hi hohmanh nih kan zumh ding a si lo. Rian ngeitu hna zong nih a rannak in fianternak an tuah a hau, buainak nganpi a chuak kho mi a si,” tiah Pu Lal Maung Cung nih a Facebook cahmai ah a langhter.
Cun, Chin Chin Pek Thang nih, “CNF/A lei nih zeihmanh kaptanh an ngeih mi a um lo. Cun, keimah pumpak min chim in mee pek sawmnak an tuah mi zong a um lo. Amah belte khuate an kal caan ah tutan thimnak cu kanmah CNF/A i policy he aa tlai mi tucu nan pek hna lai an ti cu el awk a um lo. Hi an ti zong ah CNLD party min pakhat hmanh an chim lo,” tiah The Hakha Post ah a chim.
Pi Chin Chin Pek Thang hi 2020 kum Myanmar ram party tling democracy thimnak ah Thantlang Peng, Ramkulh Hluttaw No.1 in aa zuam ding mi a si.
