Chin Evangelist Baptist Church (CEBC) le Johnson Memorial Baptist Church (JMBC) nih Thantlang sii-inn ah tangka sing 1000 budget in Chapel Hall an sak tiah theih a si. Hi Chapel saknak kong he pehtlai in Thantlang Health Care (THC) ah pastor a tuan lio mi, Pastor Thawng Tha Hmun nih a tanglei bantuk in a chim.
“Chapel kan saknak hmun hi, Thantlang sii-inn area chung ah a si. Pe 30, pe 60 in kan sak i, dot hnih ca in a si. A cung dot ahhin mizaw a rak umpitu hna le mizaw aa tel kho mi hna he, zarhpi ni ti bantuk ah pumhnak tuahnak caah kan hman lai i, a tang dot hin cun, thlacamnak, ruakhumhnak le meeting tuahnak ti bantuk a herhnak zawn ah hman ding a si lai. THC zung ca zong hi a tang dot ah a um chih te lai,” tiah The Hakha Post ah a chim.
THC nihhin Thantlang sii-inn ah a rak um mi hna sin ah, miphun le biaknak thleidannak um lo tein bawmhnak tete an tuah theo tiah theih a si. Bawmhnak an tuah ningcang ah Pastor Thawng Tha Hmun nih hitin a chim.
“THC rak dirhka ahcun sii-inn phami mizaw hna bawmh nakding caah thla khat kan budget hi sing 2 (200,000 Ks) a si. 2020 kum in kan budget hi thla khat ah sing 3 (300,000 Ks) ah kan van chap. Cun sii-inn ca hrim zong ah kan ti khawh tawk in bawmhnak kan tuah theo, bawmhnak ah a dihmi, chawnva leikam ahcun CEBC nih tuanvo a lak dih” tiah The Hakha Post ah a chim. THC cu 2018, May 1 ah rak dirh mi a si i, caan tling pastor tuantu cu Pastor Thawng Tha Hmun a si. Thantlang sii-inn ah a rak phami mizaw hna sin ah thlacamnak le thazaang peknak in vehvatnak a ngeih peng hna, tiah theih a si.
