Salai Thawngpi (Ramthlo)
A tanglei cabia hi Chinram biaceih zung, Falam pengkomh biaceih zung nih bia an rak chahmi kha lungtling loin biaceih zung sang bik an phanh hnu ah bia an chahmi a si. Hihi nihin tiang a nung rihmi asiloah hihi zohchih in biachahnak tuah khawhmi a si ca zapi rel awk ah a tawi fiannak in ka rak lehnak a si. Biafang a dikthlir in ka let lo i a sullam tlawttlau lo tein a fiannak in ka lehmi a si. Thil umtu ning Pi Phir Iang nih a va thing Pu That Nawn kha ruang um loin na ka then a ti i Chinram biaceih zung, Falam pengkomh ah 1989 kum ah taza a cuai. Pi Phir Iang nih an nuva an kawlhawlmi tangka 90,000 chung ah tangka a thimi 50,000 zuh i a tangmi 40,000 hnarcheu a simi 20,000 le chungkhar thilri man 20,000 hnarcheu a simi 10,000 le thilri man hnarcheu 1435, fonh 31,435 kha Pu That Nawn nih ka pe seh tiah taza a cuainak kong a si.
Chinram ramkulh biaceih zung nih nuva an i then hnu i a tangmi thilri man hnarcheu (1435) lawng kha Pi Phir Iang nih a co khawh ve tiah bia an chah ca ah taza cuaitu Pi Phir Iang kha a lungtling lo i biaceih zung sang bik ah a kai. Pu That Nawn nih tangka a thih lai ah 55,270 an nei na in tangka thih ah aa tel viarnak kong, an innpi zong Pu That Nawn i a nu tangka 2,000 in an sakmi a si i an bet chapmi pe 16×6 ca an nuva tangka 500 lawng aa telnak kong, Lai nunphung ah innpi cu pupa ro a si i nuva i then tikah nupi nih co khawh a si lo kong, hi buainak kong ah sang uktu pawl hmai ah voi 2 khengte nuva thennak an tuah cang i thil le ri zong an pahnih lungtling tein an i thenphawt dih cang caah taza cuainak nawl a ngeih ti lo kong a chim. Chinram ramkulh biaceih zung nih Pi Phir Iang cu Pu That Nawn nih a ruang um loin a then, an innpi zong an nuva tangka in an sak, tangka a thih lio ah 50,000 a thi i 40,000 a tang timi kong ah a dik lo tiah bia an chah.
Cu caah nuva an i then hnu ah a tangmi tangka le thilri hnarcheu cu Pi Phir Iang nih conak nawl a ngei ve tiah bia an rak chahmi a si. Pi Phir Iang i a Sihni nih biapi in a chimmi cu an nuva an i then lio ah tangka 40,000 a tang rih, innpi zong an nuva i bawm in an sakmi a si ko timi bia a fian ko bu ah conak nawl pe ve loin bia an chahmi kha a dik lo ti kha a si. Chinram biaceih zung i bia an i hal lio ah Pu That Nawn i a Sihni nih Pi Phir Iang bia a hal tikah a tanglei ning in a leh. “Tangka a thih hnu ah 40,000 a tang rih ka ti nain cu 40,000 cu ka hmu bal lo i a tawngh zong ka tawng bal lo. Innpi zong cu Lai nunphung ning ah chan khat hnu chan khat fale nih an co ding mi a si. Innpi hi Lai nunphung ning ah nuva i then a si ahcun nupi nih hal khawhnak nawl kan ngei lo nain fapa nih a nu ka thih tikah a co khawh.” [Hi bia hi Pu That Nawn i a Sihni biahalnak kha Daw Phir Iang nih a lehnak a si.] Cu caah Pi Phir Iang bia a chim ning in an nuva an i then hlan ah tangka 40,000 a taang rih a timi kong ah bia fiang a si lonak kong, Lai nunphung ah tuchin fapar tiang co ding mi innpi ro kha nuva i then tikah nupi nih co khawh a si lo caah Chinram biaceih zung nih Pi Phir Iang halmi kong ah pe loin an ummi hi a palh ti awk a tha lo.
Hi kong ah Pi Phir Iang i a Sihni nih nuva an then tikah innpi hi Lai nunphung ning in nupi nih co khawh a si lo timi hi a fekmi nunphung a si lo tiah a chim. Asinain Pi Phir Iang hrimhrim nih Lai nunphung ah nupi nih innpi hal khawh a si lonak kong, nupi a thih hnu lawng ah fapa nih a pa sin ah hal khawh a si i techin fapar tiang co dingmi ro a si kong a chim cang. Ramhrin miphun pawl i an i ngeihmi nun ning he pehtlai in kaphnih nih lungtlin lonak an ngeih lo a si ahcun biaceih zung nih thil sining zoh in i thlak a herhnak a um lo. I thlak ding zong aa remmi thil a si lo. Cu caah Chinram biaceih zung i bia an chahmi kong ah i thlak a herhnak a um lo ruangah an biachah ning in kan fehter. (Hramlaknak: Pi Phir Iang le Pu That Nawn biachahnak, 1992)
