Hi kong hi nihchuak theihtlei pakhat a si. April 1 hi April Fools’ Day (April Fool’s Day) ti a si. Phundang cun, “Mihrut Ni (Gowk Day),” asiloah “Hlenthawi Ni (Pranks or Hoaxes Day),” tinak a si. Hihi kumzabu 18 hrawng ah England hrawng ah biatak tein an hman i Scotland hoi nih cun an Nunphung Ni ah an hman i ni 2 chung an tuah.
Hi Ni aa thok ning hi an tial ning aa dang cio. Mihrut Ramvaihnak (Hunting the Gowk) in aa thok i thil a si lo mi kha i titer (phony errands) riangmang in midang sin ah an va chim mi ruang ah a si. “Gowk” ti mi cafang hi Cuckoo vaa phun a awnhnak aw a si i a sullam cu mihrut tinak a si, tiah a tial mi an um.
Cun, hi Mimolh Ni ti mi hi Geoffrey Chaucer’s nih The Canterbury Tales (Tuanbia Hleng) ti mi kha 1392 kum ah a tial mi in aa thok ti khawh a si. Cheukhat nih 1381 kum England ah an tuah bal cang, a ti mi zong an um.
Cun, a dang thiamthiam ah, hi Mimolh Ni ti mi hi 1508 kum ah French rammi biazaithiam (poet) Eloy d’Amerval nih a thokpi ve hna. Anih cu, “April thla ah nga sio ding,” ti mi tlangtaar catial in mi a hlen hna. Cucu, mitampi nih an i cawn i nihin tiang an hman thai. Phundang cun, April ni 1nak ni ah nga sio va thla ulaw, tampi nan sio lai, tiah a rak hlen hna nak a si.
Hi Ni ah hin mi pakhat le pakhat i hlenthawi le capo in i dehnak ah an hman mi a si. Newspaper, Journal, Facebook, Website, Radio, TV le Mekazin te hna ah a si bak lo mi thawng kha an tial i, taza an cuai tawn hna. A hnu ah April 1 (Fools’ Day) a si ti an hngalh tik ah cheukhat cu an ningzak lila than tawn. An nihchuak tuk than tawn.
Hi ni ah hawikom cu chimlo, rampi pakhat le pakhat hmanh kha i pehtlaihnak kong ah an i hleng i ni hnihthum a rauh hnu ah an i fianter than tawn.
COVID-19 tihnung le thinphang thlalau in kan um lio ah hin i hlenthawinak ni ah hmang loin i nuamhnak le capo saihnak ni tu in hmang cio usih!
(By; KB Thawng)
