Chin Human Rights Organization (CHRO) nih Chin Ramkulh Peng 9 ah COVID-19 runvennak bawmhnak cu July thla thok ah a voi hnihnak an pek than, tiah kan theih.
TweLet riantuannak i Deputy Project Manager Sang Uk Lian nih, “Atu hi Peng kip ah PPE set hi 40 cio a si i a zapi 360 kan pek lio hna. Cun, non-contact thermometer zong pahnih cio kan pek hna. Tutan kan tuah mi hi a phun cun a tam ngai ko. Erhkhumhnak hmun um mi kha rawl dangh, lungthin lei an der lo nakding ah phone chawnhnak, tar, ngakchia le naupawi tibantuk a hlei in bawmhchanhnak kan ngei,” tiah The Hakha Post ah a chim.
Peng kip i a um mi Zaatlang Bu hna he tuanti in COVID-19 runvennak le ralrinnak thawngthanh le caphawt zong an tuah. Caphawt pawl hi Chin Ramkulh Ngandamnak Zung nih a fehter mi lawng chuah i phawt an si, tiah kan theih.
“COVID-19 hi a dih taktak rih lo ca ah ralrin le runven hi kan pehzulh rih a hau ko. Cucaah, atu zong hi kanmah lak i minthang hna, hlasakthiam hna le model hna hmang in mizapi sin ah thawngpang thanhnak tuah than kan i timh liopi a si. Atu hi Matupi um mi CYO he i bawm in Sami i a um mi ralzaam hna sin ah bawmhnak kan va pek liopi a si. Paletwa khuachung belte hi thil cawk le thil pek ding ah tih a nun deuh rih ca ah duhning in kan cawlcang kho rih lo,” tiah a cunglei tuanvo ngeitu nih a chimchap.
COVID-19 runvennak he pehtlai in CHRO nih a tuah mi hi LIFT bawmhnak in le IOM he tawlrelti mi a si. Peng kip um mi Mino le Nu Bu hna he tuahti mi an si, tiah kan theih.
Photo/ CHRO
