Chin miphun hna nih kum khat voi khat kan hman mi ni sunglawi 2021 kum Chin Miphun Ni cu COVID-19 ruang ah tuah ding le tuah lo ding aa fiang rih lo tiah Chin Ramkulh, Cozah lei chimphuannak nawlngeitu Minister Pu Soe Htet sin in thawng kan theih.
Chin Miphun Ni hi kumfatin February 20 ah tuah a si i, 2020 kum kha Thantlang ah an tuah. Thantlang an tuah lio ah Rampi ruahnak petu Daw Aung San Suu Kyi le Vice President-2 Pu Henry Van Thio zong an rak i tel.
Chin Miphun Ni tuah le tuah lo ding kong he pehtlai in Minister Pu Soe Htet nih, “COVID-19 zawtnak hi zeitik tiangdah a si lai ti chim khawh a si lo. Phihkhar caan zong hi ni 15 ni 15 in thanh than lengmang a si. Hi zawtnak zong hi a lo colh ding zawtnak phun a si lo ca ah, tutan hi cu Chin Miphun Ni tuah kho ding dirhmun kan si lo,” tiah The Hakha Post ah a chim.
COVID-19 zawtnak a um ti lo i, Chin Miphun Ni tuah than ding a si ahcun 2021 hi cu thlanglei Laitlang Matupi khuapi ah tuah ding in, mizapi lungtlinnak a tam deuh tiah theih a si.
Minister Pu Soe Htet nih, “COVID-19 zawtnak a thian i, tuah ding a si ahcun mizapi nih Matupi hi deuh cem mi a si. Cun, Matupi hi Pengkomh an ngah tik ah anmah lei zong nih Chin Miphun Ni tuah ding hi an rak i ring ngaingai. Asinain, Ramkulh Cozah lei nih a hmun kong cu chimcaihnak a um rih lo. Thantlang, Hakha ti bantuk hi cu tuah pah tawnnak hmun a si ko ca ah thlanglei Laitlang deuh hi thim dawh a si ko,” tiah The Hakha Post ah a chimchap.
Chin Miphun Ni hi 1948 kum February 20 in pengtlang cio mah le tangka in rak tuah a si i, 2013 kum ah Cozah Budget in tuah ding ah hnatlaknak an rak ngei i, cu hnu cun Cozah Budget in rak tuah a si.
Photo/ 2020 kum Thantlang i tuah mi Chin Miphun Ni
