Thantlang Peng, Tisen khua mi kum 27 upa Salai Do Khar cu November 8 ah tuah ding mi 2020 kum Myanmar ram thimnak ah Thantlang Peng, Pyithu Hluttaw mee hmun ah Independent (pumpak) in aa cuh lai tiah thawng kan theih.
MP ah ka tlin a si ahcun Chin Ramkulh ca lawng ah si loin Myanmar ram huap ca ah tuah ding mi phun 9 ka ngei tiah Salai Dokhar nih a chim.
“MP palai ah ka tlin ahcun Myanmar ram huap ca ah tuah ding mi phun 9 kaa tim. Hi phun kua chung ah a biapi bik in kaa timh mi hi Fimcawnnak lei, ralzaam ca ah tawlrelpiak le Cozah riantuan thla hlawh lei hi an si. Kan ram chung lawng ah ralzaam dirhmun in a ummi hi minung sing 5 leng an si cang. Hi ralzaam hna ca ah Ramkomh Cozah lei nih budget dang tein an chiahpiak ding a si nain zeihmanh a um lo. Hihi MP palai ah tling ning law ka tuah hmasa cem ding a si,” tiah Salai Dokhar nih The Hakha Post ah a chim.
Thantlang Peng in Pyithu Hluttaw MP palai ah aa cuh ding mi hna hi NLD in Pu C Za Cung, CNLD in Salai Van Bawi Lian (Martin), pumpak in Salai Dokhar le USDP hi July 11 ah an i fiang te lai tiah theih a si.
Party dang ah i fonh loin amah pumpak in zuam aa timh mi kong he pehtlai in Salai Dokhar nih, “Party timi cu mizapi aiawh khotu a si lo. Cozah a ser tu ding an si. Mizapi a aiawh kho mi cu pumpak lawng hi kan si. Cun, hi hi keimah le keimah zong bia kai hal zungzal mi a si. Hmailei caan ah cun keimah pumpak zong in party zong ka dirh te kho men,” tiah a chimchap.
Salai Dokhar hi Thantlang Peng, Tisen khua mi kum 27 upa a si. Anih hi Kalay University ah B.Sc., Hons, Dip in Class in sianginn a dih i atu hi Yangon hrambunh Federal, Phunghrampi, Nu Covo, Policy le Leadership lei a tuan lio mi a si.
Cun, 2020 kum Myanmar ram thimnak ah lut ding in kum thum chung timhlamhnak ka ngei tiah Salai Dokhar nih a chimchap.
