2020 November 8 ah tuah ding mi Myanmar ram thimnak ah Zomi Congress for Democracy in Sagain ramthen le Chin Ramkulh chung hmun 12 ah an i zuam lai tiah ZCD party Secretary Pa Gin Kham Lian sin in kan theih.
“Kan party in Chin Ramkulh chung hmun 9 ah kan i zuam lai. Tedim Peng Amyotha Hluttaw ah hmun 2 he fonh in hmun 5 ah kan i zuam lai. Cun, Tonzang Peng ah hmun 4, Kalay ah hmun 2, Tamu ah hmun 1, a dihlak fonh ah hmun 12 ah kan i zuam lai. Sagaing ramthen le CAM zong kan i zuam lai,” tiah ZCD party Secretary Pa Gin Kam Lian nih The Hakha Post ah a chim.
Cun, “2020 kum thimnak ahhin kan party chung in mizeidah an i zuam lai timi cu kan chim kho rih lo. July thla thih lei ah aa zuam ding minung kan thanh lai,” tiah Pa Gin Kham Lian nih a chimchap.
2015 kum Myanmar ram thimnak ah ZCD party in Chin Ramkulh chung Tedim Peng le Tonzang Peng ah an i zuam i tulio Social Affairs Minister Pu Pau Lun Min Thang nih teinak a rak hmu.
Minister Pu Pau Lun Min Thang nih, “2020 kum Myanmar ram thimnak ah ZCD party in i zuam ding in an ka sawm. Kaa zuam than lai. Teinak hmuh ding in kaa zuam lai nain ka sungh ding zong ah ready ka si fawn ko,” tiah The Hakha Post ah a chim.
