2020 January 6 nikhat chung lawng ah Chin Ramkulh chung in COVID-19 zawtnak ngei minung 9 an hmuh i hi chung ah Hakha in minung pahnih le Tedim in minung 7 an si tiah Ngandamnak Zung nih a thanh.
Tedim i zawtnak hmuh mi hna hi Tedim khuapi Luai Bual sang ummi kum 65 upa pakhat, Sakaw lam sang um kum 69 upa nu pakhat, kum 39 upa nu pakhat, kum 27 upa nu pakhat, kum 17 upa nu pakhat, kum 65 upa pa pakhat le kum 6 ngakchia nu pakhat hna an si.
Cun, Hakha i zawtnak an hmuh mi hna hi Yangon in a tlung mi nu nau pawi pakhat le Hakha khuachung Mingarlar Hotel ah Quarantine a lut mi pa pakhat hna an si.
Tedim i zawtnak an hmuh mi hna kong he pehtlai in rian ngeitu pakhat nih, “Atu zawtnak hmuh mi hna hi an dihlak in Tedim khuapi siangsangruun sianginn No.1 ah Facility Quarantine in chiah mi an si i January 6 zinglei sang ah RDT in cheknak kan tuah i zawtnak hmuh hi an si,” tiah The Hakha Post ah a chim.
2021 January 6 tiang Chin Ramkulh chung ah COVID-19 zawtnak ngei mi dihlak minung 286 an si i, Tedim hi minung 94 in zawtnak ngei an tam cemnak hmun a si tiah kan theih.
Chin Ramkulh chung, atu pengkip sii-inn ah COVID-19 zawtnak in zohfel mi hna cu Tedim ah minung 22, Tuithang ah minung 21, Hakha ah minung 7, Thantlang ah minung 2, Mindat ah minung 1, Matupi ah minung 6 le Kanpetlet ah minung 4 an dihlak minung 52 an si.
Cun, 2021 January 5 zaan suimilaam 8:00 tiang Myanmar ram chung in COVID-19 zawtnak ngei minung 127,582, zawtnak in a thi minung 2,766 le damnak a hmu i sii-inn in chuahter mi minung 110,805 an si tiah Ramkomh Ngandamnak Zung nih a langhter.
Photo/ Internet
