(By: J. Khua Uk-Uk Pi)
Ka lonh kho ti lai lo tiah ka rak iruah theomi ni, thla le kum hna kha ka lonh khawh hna caah kaa lawmhpi (Keimah le keimah). 2020 hna cuanh than tik ah nun cawn awk thil tampi an rak um ko. Cucu theih na duh ve si lo maw?
A hleikhun in kan i ruahchan ning in hi kan vawlei pi hi a rak si lo zia hna a van ka fianter khotu kum a si, timi kaa fian Kum a si ti zong cu el awk tha lo khi a si ko hnga lo maw?Asinain, harnak tilet phunkip cung ah mah tein raltha tein ka rak tei khawh kum a si. Mah le mah idawt a that zia le mah le mah ibochan a that zia hna nun ka van cawn kum ti khawh a si ko hnga lo maw?
Nunnak ah a herh cem mi le a sunglawi cem mi nun cawnnak catlap pakhat cu harnak le fahnak chung in nun cawn thiam khi a si timi kha kaa fian pin ah harnak nih nunnak ah puitling nun a kan pek zia zong cu kaa fian chap kum a si. Cu vialte, nunnak nih a hmuhtonmi cawnnak catlap cu philh awk an tha lo i, cinken phu an si. Midang caah thazaang an si hna hnga lo maw? Cucu a tanglei ka note chungah rak rel ve.
Kei, Nunnak kan timi hi voi zeizatdah teinak thantar kan thlir timi nakin voi zeizatdah intuar khawhnak nun kan ngeih timi caminpuai kan phitnak khi a si, ka ti.
Thil pipa kan ton tikah hawikom tha le hawikom sung an rak herh tuk bantuk in thil pipa kan ton tikah hawikom tha le hawikom sung cu hngalhfian khawh an rak si. Na hawikom sung caah caan va pe. Khat le khat ibawm u, idirkamh u.
Zeitik caan hmah ah midang thazaang bochan nun ngeih itim hram hlah. Harnak tilet ka sin a phak tik ahcun an ka bawmh theo ko lai dakaw tiah vaa ruahchan hlah. Mikip nun ahhin mah le sining cio in harnak tilet he ipaih cio a si.
Mino pawl sinah hmunhma pek timi hi a tak nun ah a um lo. Biatlang lawng ah na rel lai i, cabuai cung Bia lawng ah na theih theo lai. Zuamcawhnak bual le a tak nun ahcun dodaltu rumro khi an si ko hna lai. Nain cu bantuk dodaltu karlak ah na ngeihmi thazaang he dir khawh izuam zungzal.
Teinak, sunghnak, thatnak, chiatnak hna hi nangmah sin lawng ah an um lo. Vawlei mizapi nih a ton peng ve mi a si ko tihi philh hlah.Vawlei cung milu billion 7 leng a ummi ahhin mikip nun khi na lawmhter kho bal lai lo. Cucaah mi kip lungton vaa timh tuk cu na retheihnak tu a si lai ti zong hi thei chih ko tuah.
An nunnak ah harnak a um ko bu ah na harnak an bawmtu hna khi na thisa in lawmhnak chim philh sual hlah. Cu hna pawl cu na nunnak ah dawtu tha an si. Teinak kan ti lengmang mi hi, tangka ah a si dih lo. Rank (todan sang) zong ah a si dih lo. Back ground (chungkhar tha) tha va ngeih khi a si dih hlei fawn lo. Teinak kan timi cu naa hngilhnak in an thotu niceu dawh khi, lungthin daidam tein le phuhrunnak um lo tein, tihnak um lo tein, fahnak philh in lungthin mirhnak he rak don tu khi a si. Cucu nunnak nih a kenmi teinak taktak cu a si.
Rian pakhat kaa awt cang lai kan ti tikah Plan A, Plan B, Plan C ngeih a herh pin ah escape Plan tiang khi telh chih a rak herh. Ruahdamhnak in karhlan si loin, ningcang tein kal ding kha iruat. Tlakchiatnak va um ai kun a ka chanhchuah khotu ding tiah ruahcia mi na hei ngeih ko hmanh ah a hlankan tein chimh cia izuam.
Zeitik caan hmanh ah, zei bantuk hmun hmanhah, ruahchannak fak tuk in vaa chiah hlah. Hihi cu a zungzal in cinken ding bia a si. Pathian kha ibochan. Peknak lei ah nun va siang ko. Hmuh lei ahhin nuamhnak cu a um ko nain, peknak lei ahhin lawmhnak tling cu a rak um. Hmuh lei nihhin thilrit a ratpi theo dakaw. Nain pek lei ahcun lungdiriamhnak le hnangamnak nun a rak itel chih.
Na tlukrilh caan zong a voi a tampi men ko lai. Nain ifahsaknak nun he thawh than izuam zungzal. Na tlukrilh lio le na zaangder lio ah an domhtlaihtu le an tungmertu hna kha zeitik hmanh ah va philh hna hlah.
Dawtnak kan timi zong hi par bangin a ziam kho i, ni bang a liam kho ko dakaw. Cucaah nan umti lio ah idaw ko u. Upatnak ipe ko u. Nuam tein nicaan hmangti ko u. Kan nunnak in cu dawtnak a liam sual a si ahcun zaangdam tein mangtha cah khawh itim.
Duhnak kan timi hi feeling sawhsawh a si lo. Thimmi a si. Cu na thimmi cungah theihthiamnak nun ka pe kho lai maw? Upatnak nun teh ka pe kho lai maw? Ngaihthiamnak nun hiteh ka pe kho lai maw? Ka caan sung teh ka pe kho lai maw? a herh caan ah a pawng ah ka um- piak kho taktak lai maw?tite hna ihal hnu ah ithim in sermi a si. Cucaah duhnak cu thimnak in a ra hmasa mi a si, ka tinak cu asi.
Dl cu vaa chiah duh hlah. A caan a cut incun nan ithen thotho ko lai. Nain, na nunnak ah a donghnak tiang na duh ding mi le an daw ve ding tu khi fel tein kilven thiam izuam law, va daw zungzal ko.
Nunnak nih an pek mi cawnnak catlap hna hi cinken izuam law, na lungthin ah rawn hna. Nun cawnnak kan timi cu a ho saya zong nih cawnpiak khawh mi a si lo caah sunhlawih zia thiam hram.
Hei, nang kha na kum a no rih ko. Nain ka no tuk rih timi ruahnak na ngeih peng a si ahcun mi puitling dirhmun phak cu iruahchan awk a tha hnga lo. Hngakchia bantuk in khuaruat ti hlah. Hngakchia bantuk in nung ti hlah. Nangmah na nunnak cu nangmah te nih a muisam na suai a haumi a si. Nangmah le nangmah bochan a herh zia kha zeitik hmanh ah va philh hlah.
“Whatever happens, please stay strong”….
