2019 October thla chung ah 2.9 Billion dih in tuanhram an rak thok mi Thantlang khuapi chung din ti cu, khuami hna nih an i ruahchan ning tluk in ti an ngah lo ca ah harnak an tong tiah thawng kan theih.
Thantlang khuapi chung din ti ca ah ti an laaknak hi Thantlang Peng, Sihcang ram chung i Khuaiva ti an laak mi a si.
Thantlang khuapi chung ti an har ning kong he pehtlai in No.1 sang um Pu Sang Cem nih, “Thantlang khuapi chung ah ti a har mi le har lomi sang tiin kan um. Tangka tampi dih in Sihcang ram ti laakpiak kan si. Sihcang ram ti a phak khawh taktak ahcun, ti kan har ti lai lo tiah khuami kan lung a rak i lawm. Asinain, Sihcang ram ti an laak hlan le an laak hnu hi aa dannak a um lo. Zeicati ahcun, Sihcang ram ti an laak hlan ahhin, pipe lu pakhat khi chungkhar pasarih nih kan i hrawm i, ni khat ah ti pung nga cio kan ting. An laak hnu zong ah cu thiamthiam kan si ko. December thla kan vun phak hnu cun, inn khat ah pung 4 lawng kan co cang. Hi bantuk dirhmun kan si tik ah ti lei ahhin rian ngei hna nih tha deuh in kan tawlrelpiak hna sehlaw kan duh ko,” tiahThe Hakha Post ah a chim.
Ti hi ni khat ah voi hnih tiang cu pek an si. Asinain, an pek hna ning zong hi a dik in a tluang kho lo. Zing ah an pek hi a tam, zaanlei tu ahcun a caan caan te lawng ah an pek hna tiah theih a si.
Cun, Sianginn sang ummi Pu Roben nih, “Sihcang ram ti an laak mi hi honnak an tuah hnu kan sin ah voi khat hmanh a rak chuak rih lo. Kannih hi cu a hlan i ti kan hman tik ah, ti cu kan harsa taktak. Ti pipe pakhat khi chungkhar paruk kan i hrawm tik ah, pungkhat lawng kan co. Pung khat lawng a si tik ah chumhkhin lei ahhin kan har ngaingai. Cun, thilsuk kan duh caan zong ah Lahva le a dangdang tiva ah kan kal tawn,” tiah The Hakha Post ah a chim.
Cozah lei nih 2.9 Billion dih in an tuah mi Sihcang ram ti an laak mi hi 2020 February 14 Thantlang khuapi chung tiang ti a phan tiah theih a si.
Thantlang Sipin Lutlai Pu Van Za Uk nih, “Khuaiva ti kan laak mi hi 2020 February thla chung ah ti a phan. Distribution tu hi cu a ra lai ding tangka kum ahhin tlamtling in kan tawlrel lai. Sianginn sang lei hi Khuaiva ti an ngah lo. Anmah zong ti an i zat ko ca ah kan pe hna lo. Cun, sang mi hna lungtlin pinak zong kan laak mi a si,” tiah The Hakha Post ah a chim.
Ti an laak ning hi private in a laa mi zong an um i pipe pakhat chungkhar 7 aa hrawm mi zong an um nain, ngunkhuai an pek ning cu aa khat dih tiah theih a si.
