Tonzang he meng 15 a hlatnak Mualkawi khua ah a rak lutmi ZRA pawl cu CNA le CDF-Tonzang nih kan dawi hna, tiah CDF-Tonzang nih nihin November 5 ah theihternak a tuah.
“Atu kum May 23 ah ah Cikha le Tonzang khua cu Chinland ralkap nih laak a si nain thil sining tampi ruang ah Cikha khua ah Chinland ralkap chiah an si lo. Cu thil sining cu caanṭha ah i laak in Cikha ah ZRA hmunhma an khuar,” tiah CDF-Tonzang nih a langhter.
“Cikha ah a ummi ZRA nih Tonzang kan laak ṭhan lai tiin
CDF-Tonzang le CNA cu a kan ngiar lengmang. Tonzang he meng 15 a hlatnak Mualkawi khua tiang an rak lut,” tiah a langhter chap.
Mualkawi khua ah a phanmi ZRA le CNA/CDF-Tonzang cu October 20 le 21 ah a an i kap.
CDF-Tonzang nih a langhter ning ah cun kahdohnak ah ZRA lei in minung 10 hrawng an thi a ti i, CDF-Tonzang zong in ralkap pakhat a thi, tiah a langhter.
“ZRA hi Chin miphun an si nain SAC he ṭang in Chinland Council le Tonzang mizapi ukhruaitu bu zohkhenhnak tang ah a ummi hmunram ah hnahnawhnak an rak tuah caah kan kahmi hna a si. Tonzang peng chung in ZRA kan ṭhawl dih cang hna lai,” tiah CDF-Tonzang nih thawng a thanh.
