Ralkap tlakter ding in ZRA (Eastern Command) nih an tlaih mi hna ngakchia pakua cu nihin July 9 ah an thlah ṭhan hna, tiah theih a si.
July 6 ah khan Tedim peng, Tungzang khuate ah ZRA pawl nih khuachung inn khat hnu inn khat lut in camhcawhfung an zuhter hna i ngakchia 9 cu ralkap caah an rak kalpi hna.
Khua upa hna nih ZRA sakhaan ah an kal i nawlnak an tuah hnu ah ngakchia pakua cu ZRA nih an kirter ṭhan hna hi a si.
Tualchungmi pakhat nih, “Ngakchia pawl inn ah an rak phan ṭhan hi an i lawm tuk. Nu le pa zong an i lawm tuk hringhran. A kenkip in a kan bawmtu nan dihlak cung ah kan i lawm tuk,” tiah a chim.
Atu bantuk in kumtlinglo ngakchia tete ralkap tlakter ding in ZRA nih an tlaih hna caah Tungzang khua tel in kiangkap khua i taang 5 cung ngakchia pawl cu khua ah um ngam lo in ramlak ah an zaam dih hna, tiah theih a si.
