Zomi Revolutionary Army (ZRA-EC) nih Tedim peng khuate ah kumtlinglo ngakchia 8 cu ralkap tlakter ding in an tlaih hna, tiah theih a si.
July 6 ah khan Tedim peng, Tungzang khuate ah ZRA ralkap pawl nih kum 13 hrawnghrang a si mi ngakchia 8 cu ralkap tlakter ding in an tlaih hna i an kalpi hna, tiah tualchungmi pakhat nih a chim.
“ZRA pawl nih khuachung inn khat hnu inn khat in an lut i, ralkap tlakter ding in camhcawhfung an zuhter hna. Taang 4 cunglei pa ngakchia poh cu ralkap tlak an ṭih caah khua in an zaam dih hna,” tiah tualchungmi pakhat nih a chim.
Tedim in meng 20 hrawng a hlatnak Tungzang khua ah cun camhcawhfung an zuhter hna i kum 13 hrawnghrang a si mi ngakchia 8 cu ZRA nih an kalpi hna, tiah a chim chap.
Tungzang khua lawng ah si lo in Cikha le Vom khua tel in a dang khuate 4 zong ah ZRA nih ralkap tlakter ding in camhcawhfung an zuhter hna, tiah theih a si.
