Nihin September 10, zinglei ah CDF-Tonzang Camp No. 2 cu Zomi Revolotionary Army (ZRA) nih an kah hna caah CDF-Tonzang ralkap pakhat a nunnak a liam tiah CDF-Tonzang nih a thanh.
“ZRA pawl nih, Khrihfa mi kan ni sunglawi Zarhpi ni hmanh hrial lo in an rak kan kah caah CDF-Tonzang kan ralkap pakhat nunnak a liam. Cucaah, nihin 10-9-2023 ni cu CDF-Tonzang le Zo miphun hrihhruai dihlak nih philh awk a tha lo mi, thisen aa neh mi Zarhpi ni a si,” tiah CDF-Tonzang nih a langhter.
Cu kahdohnak ah cun ZRA pawl hmapu an tam caah Lungtak khualei ah hnu an tolh. Lungtak khuami motorcycle pahnih an chuh hna hnu ah an zaam ti zong an telh.
A luan cia August 31 zong ah ZRA le SAC ralhraang hna i bawm in CDF-Tonzang camp pakhat an rak kah caah CDF-Tonzang ralkap pakhat a nunnak a rak liam i hriamnam kuanzen zong an rak sung. ZRA cu lehrul ka cham hrimhrim lai tiah September 5 ah CDF-Tonzang nih a rak thanh hnu ni tlawmpal ah atu bantuk in ZRA nih ngaihthlem in CDF-Tonzang camp a kah than hi a si.
Hmanthlak: CDF-Tonzang (CDF-Tonzang ralkap pawl hmanthlak hlun a si.)
