Tonzaang khua ah ZRA ralkap chungkhar le ZRA supporter pawl nih an ngeihmi inn pawl cu CDF-Tonzaang nih an kharpiak hna, tiah theih a si.
ZRA he aa pehtlaimi hna inn 15 leng kharpiak an si cang i, dantatnak tangka an liam hnu ah CDF-Tonzaang sin ah an i fonh lawng ah inn pek ṭhan an si lai, tiah CDF-Tonzaang ralbawizik nih a chim.
CDF-Tonzaang ralbawizik Pu Than Suan Mung nih, “Inn 15 kan kharpiak hna. Dantatnak tangka an liam lai i, CDF-Tonzaang he rianṭuan ṭi ding in kan sin ah an i fonh ahcun inn kan pek ṭhan hna lai,” tiah Chin World ah a chim.
“ZRA ruang ah CDF-Tonzaang ralkap pahnih an nunnak a liam i, tangka le chawva tampi kan sunghmi zong a um. ZRA nih atu bantuk in nawlngeihnak a ngeih khawhmi hi Supporter pawl ruang ah a si. Cucaah, kan sunghmi vialte hi anmah (supporter) pawl zong nih an liam sawk a si,” tiah a chim chap.
Atu bantuk in ZRA chungtel pawl an inn kan kharpiakmi hna le kan tlaihmi hna hi hrem duh le thah duh ah a si lo; lam dik lam hmaan ah kal hna sehlaw kanmah he rianṭuan ṭi hna seh timi kan duh caah a si, tiah CDF-Tonzaang ralbawizik nih a chim.
Tonzaang khua cu Chinland Council ralkap hna nih an rak laak hnu ah atu ahcun Tonzaang Township Council nih mizapi ukhruainak rian a thawk cang, tiah theih a si.
