Myanmar ram chung ah COVID-19 mizaw minung 346 a si cang i, July 24 suimilaam 8:00PM ah Ramkomh Ngandamnak Zung le Zaanglek Zung nih mizapi sin cathanh a chuah mi chung ah Chin Ramkulh chung in India tlung minung 2, kum 29 upa le kum 18 upa hna sin in zawtnak hmuhchap an si tiah aa tel.
Chin Ramkulh chung ah atu an hmuhthar mi minung 2 telh in COVID-19 mizaw minung 14 an si cang i hi hna chung ah minung 10 hna cu voi hnih tiang zawtnak an cheknak ah a phichuak negative an si ca ah sii-inn in an chuahter cang hna.
Hi kong he pehtlai in Tedim sii-inn i Sister Pi Zam Cing nih, “Atu hmuhthar mi Case No. 344 le 345 hna hi India ram in an rak tlung i Tonzang Peng, Cikha khua ah Facility Quarantine in a um mi an si,” tiah The Hakha Post ah a chim.
Mizaw hmuhthar mi hna hi Tedim sii-inn ah thial an si lai tiah kan theih. Cun, Tedim sii-inn ah COVID-19 mizaw India tlung minung pahnih an chiah hna.
Myanmar ram pumpi huap in July 24 ah zawtnak an chekmi minung dihlak 1,329 an si i, hi hna chung ah minung 3 sin ah zawtnak hmuh a si.
