Mizoram, Lawngtlai in Myanmar lei ah diesel le petrol luhpi an phih hnu ah Myanmar lei ah lutpi an timhmi diesel le petrol pawl cu Lawngtlai District Lai mino bu YLA nih pehtlai in an tlaih, tiah theih a si.
July 1 zinglei ah khan Myanmar lei ah kuat an timhmi Diesel phortu motor 7 cu YLA Ceural Branch nih an tlaih. June 1 ṭhiamṭhiam ah Tuidangtlang ah Myanmar lei phorh timh mi Diesel le Petrol pawl an tlaih chap.
July 2 zinglei zong ah diesel a phortu motor 6 cu Lawngtlai district chung ah an tlaih ṭhan. Hi motor 6 nih hin diesel ṭengki 57 an phorh i India tangka in ting 10 man hrawng a si.
Diesel a phortu hna cu Siaha District chung ah khua a sa mi an si i, hi diesel pawl hi Saiha District chung i Myanmar he a naihnak Lungpuk khua ah kalpi an timh, tiah theih a si.
Saiha District caah an phorhmi Diesel le Petrol tampi cu Saiha District mipi caah hman lo in Myanmar ram lei ah phungning loin an zuar tawn caah Saiha Diesel le Petrol zuartu pawl nih Diesel le Petrol Pump khar dih in duhlonak an langhter ve.
Atu bantuk in Mizoram in Myanmar ram lei, abikin Rakhine lei ah Petrol le Diesel phungning lo in tam tuk luhter a si ruang ah Lunglei District, Lawngtlai District le Saiha District nih Myanmar ram lei ah Diesel le Petrol phorh an phih, tiah theih a si.
