Karen ramkulh, Doo Pla Ya pengkomh chung, Thai-Myanmar ramri ah a um mi Yetasout SAC camp laak kahdohnak ah raal hriamnam an laak mi pawl cu KNU, Doo Pla Ya Distric nih nihin ah a langhter.
Cu SAC camp cu Karen National Liberation Army (KNLA) B-18 le ttangtti phu komh nih nizan September 14, zinglei suimilaam 7:55 in an luhhnawh i zinglei 8:20 ah camp pumpi in an laak khawh. Cuka ah cun SAC hraimnam le kuanzen tampi an laak khawh tiah an thanh.
Kahdohnak ah SAC ralkap 9 an thi i a dang pawl cu an zaam. KNLA le ttangtti phu lei in pathum hma an pu i pakhat nunnak a liam tiah KNU nih an langhter.
SAC Yetasaut Camp ah an laak mi raal hriamnam hna cu: MA-1 zun 1, MA-2 zun 2, MA-3 zun 1, MA-4 zun 2, RPG-7 zun 1, 60mm zun 2, pistol zun 2, machine gun zun 1 an si. Cun an laak mi kuanzen hna cu: RPG-7 bomb kuan 70, 81mm kuan 40, 60mm kuan 110, M-79 kuan 40, 5.56 zenthong 2800, 7.62 zenthong 800, mine 46, pehtlaihnak seh ngan 1, map 1, kut cheh bomb 20, compass 2 an si tiah cathanh ah an tial.
KNU ukhruainak hmun a si mi Doo Pla Ya pengkomh, Brigade-6 hmun chung ah a um mi SAC camp pawl le raallam sial ah a ra mi ralhraang pawl cu KNLA le ttangtti phu komh nih ni fatin ti awk in an kah lengmang hna caah SAC ralkap lei a thim mi an karh chin lengmang ti zong cathanh ah an telh.
Cu pin ah Camp chung um SAC ralkap hna le an chungkhar pawl zong an thinlung a zor caah KNU le dothlengtu phu hna sin ah a zaam mi tampi an um ti zong an langhter.
Photo –KNU, Doo Pla Ya District
(Yetasaut Camp kahdohnak ah laak mi SAC hriamnam pawl)
