Magwe ramthen, Yesagyo khua, Phaung Taw Oo sang ah ralhraang nih hmun an khuarnak Nyein Zar Ni Sakhan kan kah i ralhraang 15 nak tlawm lo an thi, tampi hma an pu tiah Myingyan Black Tiger (MBT) in tuanvo ngeitu nih Khit Thit Media ah a chim.
Ralhraang 20 hrawng nih umhmun an khuarnak sakhan cu nizah February 13 zaanlei 5:00 hrawng ah rammi rungvengtu ralkap hna nih an kah i ralkap tampi an thi. Machine gun tlaitu ralhraang pakhat lawng a taang cang i sakhan an laak khawh dengmang lio ah bawmtu ralhraang tampi an rak phanh caah lakhruak in kan kir than tiah an chim.
“Sakhan kan laak khawh dengmang. Machine gun tlaitu pakhat lawng a taang cang. An rat nakding lam vialte ah bomb kan tarh dih. Kan puah. An rat nakding lam pakhat lawng a taang cang. Cuka lam in an rat lio i bomb puah kan timh lio ah khuami pawl nih a rak kan bih. Khuami pawl an um caah kan puah than lo. Kan hnulei in meithal auto in a kan kah i hodah a si hnga tiah zoh naklak ah kanmah mi siloin uico a rak si, cuti cun hnulei ah kan kir than,” tiah Myingyan Black Tiger (MBT) ralkap phu in tuanvo ngeitu nih a chim.
Cu kahdohnak ah cun Yesagyo Palek Sakhan le zung kip ah umhmun a khuar mi ralhraang pawl nih an rak bawmh hna. A thi mi le hma a pu mi ralhraang pawl cu Phyu Sin, mi bawmchantu phu nih motor in voi thum khengte an thiar mi hna hmuh a si tiah an chim. Rammi rungvengtu ralkap lei cu hmapu um lo tein an kir kho tiah theih a si.
“Uico pakhat telawng a taan lio ah kan zaam than mi cu lung a faak tuk. Khuami nih an rak kan zoh caah bomb kan puah kho ti lo. Bomb kan tarh mi hmanh kan phoih manh ti hna lo,” tiah MBT tuanvo ngeitu nih a chim.
Cu kahdohnak cu Myingyan Black Tiger (MBT) le ttangti hawi a si mi Monywa Pengkomh Battalion 12, Company-4 (Mitauk Company), Chaung U LDF; Banana UG; Khuatdawngni; VOMDY-Front Warrior phu hna i komh in an tuah mi a si. An kir than lei ah ralhraang nih Chindwin a chunglei tiang an dawi hna caah an i kapchap tiah theih a si. Ref: Khit Thit Media
