Tanintharyi ramthen, Yephyu khua in Kalainaung khua lei a kal mi SAC motor cu rammi ralkap phu komh nih bomb an puah caah captain pakhat tel in pali an thi tiah theih a si.
Cu SAC ralkap motor cu ralhraang 12 nih an i cit mi a si i rammi ralkap phu komh nih a thazaang a thawng mi bomb pahnih in an puah hna tiah theih a si.
Patrolling a vaak mi SAC ralhraang motor cu June 30 zanlei suimilaam 3:06 hrawng ah, meng 41 ka zawn, reite dum pawng ah YPPDF, KLASBL, KTLA phu komh nih bomb pahnih in kan puah tiah Yephyu PDF nih thawng an thanh.
Rammi ralkap phu komh nih bomb an puah hna ruang ah SAC ralhraang battalion-408 in captain pakhat tel in pali an thi i, pali hma faak ngai an pu tiah theih a si.
Bomb an puah hna hlan ah SAC ralhraang pawl le rammi ralkap phu komh cu minute tlawmpal an i kaap i rammi ralkap lei hma pu um hraw lo tein hnu lei ah an kir kho tiah an tial.
Rammi ralkap lei nih kahdohnak faak deuh in an tuah lio a si caah a herh tuk lo ahcun tlunkal i sum ding le Kalainaung – Yephyu lam cu zinglei 5:00 in zaan 8:00 tiang lawng tlunkal ding in nawlnak zong an langhter.
