Atu August thla chung ah Yangon le Mandalay tel in Myanmar ramchung khuapi cheukhat ah mino tampi aruang um loin SAC ralkap le palek nih an tlaih hna, tiah theih a si.
August 25 in 29 karlak, ni 5 chung lawng ah Yangon khuachung ah kum 19 in kum 30 karlak a simi mino 30 hrawng tlaih an tong, tiah RFA nih a ṭial.
Mandalay khua zong ah August 27 in 28 karlak, ni 2 chungte ah mino 20 hrawng cu SAC ralkap le palek nih an tlaih hna, tiah a langhter chap.
Sagaing ramṭhen, Monywa khua zong ah motor in aa chokletmi SAC ralkap le palek pawl chun lingcing ah mino tampi an tlaih hna lawng si loin hmun cheukhat ah cun lakphakti dawr chung tiang ah an luh hnawh hna i an tlaih hna, tiah tualchungmi nih an chim.
Cu lawng si loin, Pago, Taungngu le Oktwin khua pawl ah SAC ralkap le palek nih motorcycle aa citmi pawl an check hna i tangka a liam kho lomi cu ralkap tlakter ding in an tlaih hna, tiah Khit Thit Media nih a langhter ve.
Tlangcungmi hmunhma hna le Mandalay ramṭhen le Sagaing ramṭhen ah ral a sung thluahmahmi SAC nih ralkap thazaang thar chap ding in aa zuam i kum 65 minung pawl zong Pyituhsit training kai ding in atu August thla chung ah nawl a chuah, tiah theih a si.
