Chinram in Yangon ah ral a zaam mi Chin mino pahnih cu SAC ralkap nih an tlaih hna i hramhram in ralkap ah an tlakter hna, tiah theih a si.
Hramhram in ralkap ah tlakter a tong mi Chin mino pahnih hi Paletwa peng in Yangon ramṭhen, Hmawbi ah 2024 kum thawk hrawng khan ral a zaam mi an si.
Kum 27 hrawng a si mi pa hi Hmawbi in Shwebo lei a kalnak lampi ah SAC ralkap nih mi checknak gate pakhat ah an tlaih i Shanram, Tuangkyi khua i SAC ralkap training camp ah an kuat, tiah chungkhar he naihniam nih an chim.
Kum 25 hrawng a si mi pa hi payan rian a ṭuan mi a si i aa hlawhfahnak in inn lei a ṭinnak lampi, Hmawbi khualuhnak gate ah SAC ralkap nih an tlaih i Hmawbi khua i, Ba-Ka-Ta camp ah an chiah, tiah theih a si.
Tuangkyi ah an kuat mi pa hi tlaih a ton ka ah khan a chungkhar nih tangka in tlanh an timh nain an tlanh manh hlan ah Taungkyi lei ah an kuat. Ba-Ka-Ta camp ah an chiah mi pa tu hi atu tiang a thawngpang an thei ti lo tiah chungkhar he naihniam nih an chim.
