World Bank tuanvo ngeitu Hakha-Falam-Kalay lam zohfel ding ah an ra than lai

Hakha-Falam-Kalay nylon kataza phah ding World Bank nih tangka cawih mi kong le lam phah ding mi zohfel than ding ah World Bank tuanvo ngeitu March 18 ah Hakha phan in ni 19-21 tiang an um lai, tiah tuanvo ngeitu sin in March 8 ah thawng kan theih.
“World Bank in tuanvo ngeitu hi voi 5 hrawng Hakha an phan bal cang. Atu zong an ra than lai i ni thum chung an cam lai. Zohfelnak le rian dawmh ningcang pawl an zohfel lai. Hakha-Falam-Kalay hi meng 124 a hlat i zeitik ah rian kan thawk lai i zeitik ah kan dih lai ti zong a fiang kho deuh rih lo,” tiah Chin Ramkulh Lamsuul Minister Pu Sui Thio nih The Hakha Post ah a chim.
World Bank nih Hakha-Falam-Kalay lam nylon kataza phah nakding ca ah US dollar 66.8 million a cawih. Khuate cheukhat nih ningcang loin bia an chim mi ruang ah World Bank nih tangka cawih timh mi chuh than ding ti a si nain Chin Ramkulh Cozah tuanvo ngeitu hna le Vice President Pu Henry Van Thio i bawm in an tawlrel hnu ah tlam a tling than mi a si, tiah kan theih.