Kachin ramkulh, Winemaw peng chung i SAC kut tang Pyituhsit luzik a si mi U Swe Min cu nihin March 7 zinglei ah a cang mi KIA he kahdohnak ah a thi, tiah hmanthlak he an fehter.
Nihin zinglei sml. 7:00 ah Winemaw peng, Shwe-Ngyawng-Pyin kahdohnak ah U Swe Min hi a thi, tiah Kachin tualchung thawngzamhnak le People’s Spring nih an langhter.
“Nihin zinglei ah Winemaw in Shwe-Ngyawng-Pyin lei an rat lio ah KIA nih lampi ah an kah hna i U Swe Min tel in a hawile vialte an thi dih,” tiah People’s Spring nih a tial.
U Shwe Min i a ruak le a thilri pawl cu KIA nih an zohfel hnu ah amah a si ko, tiah an fehter.
Winemaw Pyituhsit hruaitu U Shwe Min hi Lisu National Development Pary (Dulay Party) Chiarman zong a si, SAC ralkap nih Myanmar ram uknak an laak hnu ah Lisu mino pawl Pyituhsit ah luh ding in a forhfial lengmangtu a si, tiah an ti.
Nihin zinglei sml. 7:00 thawk in khan KIA le Kachin-PDF nih Winemaw peng, Moemauk peng le Laiza kiangkap i SAC ralkap sakhaan 12 hrawng cu hmun khat ah an doh i, atu tiang ah a tlawm bik SAC ralkap sakhaan pali an laak khawh cang, tiah Kachin tualchung thawngzamhnak hna nih an tial.
