Kahdohnak ruang ah thla tampi ei awk din awk ngei loin a um mi Chin Ramkulh thlanglei Laitlang Paletwa khuapi chung i aa dormi ralzaam hna ca ah le Paletwa khuami hna ca ah World Food Program (WFP) nih bawmhnak thilri ton 165 July 21 ah an phak khawhter than tiah WFP lei in Saya Htet Oo Lin sin in thawng kan theih.
Saya Htet Oo Lin nih, “Thlanglei Laitlang hi mizapi nih nan theih cio bantuk in furpi ahcun lamsul lei hi a har taktak. Lamsul lei a har mi lawng si loin kahdohnak hi a chuak pah lengmang. Hi harnak hna cu hnu ah chia in minung le minung i dawtnak lungthin le i tlaihchannak lungthin he Paletwa khuapi chung ah kan phakpi khawh than. Hiti tluang tein kan phakpi khawhnak zong hi kanmah thil ti khawhnak lawng si loin Chin Ramkulh Cozah bawmhnak thawng zong in a si,” tiah The Hakha Post ah a chim.
Paletwa khuapi chung ah a phan mi WFP bawmhnak hi Paletwa khuachung i minung 4000 leng hna ca ah thla 2 chung nifatin eidin a nguhdeih hna lai tiah WFP nih cathanh a chuahmi ah aa tel.
“Paletwa khuachung ah a ummi chungkhar hna hi ral ruang ah tuan awk ngei lo, chawlehthalnak hmun ngei loin an um. Hiti an um ca ah nifatin eidin lei lungrethei in an um zungzal. Minung le minung i dawtnak lungput te he bawmh le zuanhnawh hi an herh zungzal ko,” tiah WFP Lutlai Stephen Andasan nih a chim.
WFP lei in 2020 kum chung ah bawmhnak thilri an phakpi hi atu in a voi 2nak a si. Hmailei zong ah bawmhnak pek kan i tim rih tiah saya Htet Oo Lin nih a chimchap.
A voi 2nak bawmhnak thilri an phakmi hi facang tun 2700, chiti pung 10000 (1 liter), kalape tun 300 (50kg), cite le changreu hna an si.
