Sagaing ramṭhen, Wanthu peng chung ah SAC ralkap nih minung 19 an thah mi hna ruak cu January 7 ah kan hmuh hna, tiah Kawlin Revolution (KR) nih thawngthanhnak an tuah.
Miruak 19 an hmuh mi lak ah 17 hi pa an si i, pahnih hi nu an si. Atu tiang an hliah khawh mi hna ah facang zuartu Daw Khin Sein, U Thein Htay, U Hein Zaw, U Tun Zaw Hlaing le U Nga Tun timi hna hi an i tel.
January 5 ah khan Wanthu khua hrambunh SAC ralkap Kha-Ma-Ya (120) pawng i Laybu ti mi khuate ah SAC ralkap an vung lut i, facang zuartu le motor mongtu pawl an tlaih hna. An tlaih mi hna cu Kha-Ma-Ya (120) sakhaan ah an kalpi hna, tiah Khit Thit Media nih a ṭial.
An tlaih mi hna facang zuartu le motor mongtu hna cu SAC ralkap nih an zapi in meithal in an kah hna i an ruak an hlonh hna, tiah KR thawngthanhnak ah an langhter.
Thah a tongmi hna lak ah an kut le an kee hri in ṭem mi zong an um. Cun, an lut le an ṭaang tibantuk ah meithal kahnak hma pawl zong an um. An ruak an hmuhnak pawng ah SAC ralkap hman mi meithal kuanhawng (5.56) kan char hna, tiah KR nih an langhter.
