VP Pu Henry Van Thio nih Bungzung Lungraang Mirang vawlei sehzung hun nakding a zoh than, thaal chung ah seh bunh timh
Bungzung pawng Lungraang tlang ah Mirang vawlei sehzung hun nakding cu March 2 ah Myanmar ram Vice President-2 Pu Henry Van Thio, Chin Ramkulh Cozah lutlai hna le khua upa hna nih an zohfel than, thaal chung ah riantuan hram an thawk cang lai, tiah kan theih. “Hi sehzung ah seh pathum an bunh lai.
Atu hi an tawlrel cuahmah i April thla chung ahcun thil a fiangfai kho ding a si. Hi Lungraang tlang lung hi an zohfel tik ah kum 200 chung hmanh ah a lung a dih lai lo an ti. Cozah nih kum 30 ca in a tuah lai i ramchung lawng si loin India ram tiang zuar khawh a si lai.
Hi sehzung nih hin a kan cawm te lai. Riantuantu zong a tlawm bik minung 1000 cu a hau te lai i kanmah Chinmi nih kan pawcawmnak ah hmang kho usihlaw a tha tuk hnga.
Sehzung tuan nakding hmun hi A,B,C,D tiah an then i Mirang vawlei (cement) tam taktak a chuak lai ti a si.
“D” hmun ah Massive unit Limestone ti mi thungraang hi million 56.00 tones in million 61.00 tones a chuak lai. Bangladesh le India ram kuat khawh ding in Lei-um pawng Riva hlei zong million 755.00 dih in an dawnh lio a si,” tiah hi hmunhma zohfelnak ah a kal ve mi Chin Ramkulh Sipin Lutlai hlun Pu Thla Hre nih The Hakha Post ah a chim.
Hi Lungraang tlang hi Bungzung khua in meng 12 le Lei-um khuathar in meng 5 lawng a hlatnak hmun ah a um mi a si. Lam zong an pemh cang. Thaal chung ah riantuan hram thawk khawh ding in an tawlrel i tlam a tlin ahcun Chinmi pawcawmnak ca ah a thahnem ngai ding a si, tiah an chim cio.
