Hakha khua Vomtumaung Ceertual thlang motor lam, HBC Biakinn lampialnak zawn cu 2018 Fuur lio tein lam lai vawlei a tla i pe 4 pe 3 tluk khor ah aa cang nain tuanvo ngeitu hna nih nihin tiang an remh rih lo ca ah khawndennak tete a chuk pah lengmang tiah pawngkam mi hna sin in kan theih.
“Kan hnu kum Fuur lio ah khan vawlei tang lutihor an ser mi ah ti aa tlum lo i cho pah in a rak pah mi a si. A pah ka ah khan cun a bi te nain duhsah tein a kau thluahmah. Zaan ah motorcycle zong an tla pah lengmang. Motor zong voi thum hrawng an tla cang,” tiah cuka pawng ah a um mi nutung pakhat nih a chim.
Car gate kalnak lam a si pin ah HBC Biakinn pialnak zawn lam lai ah a si i mi tampi nih an zawh mi lam a si.
“Tuanvo ngei nih an rak zoh pah lengmang ko nain nihin tiang remh rih lo. Motor le motorcycle aa chawklet mi hna ca ah tihnung ngai a si. Zaan hrimhrim ahcun an tla pah lengmang. Faak tuk in aa khawng mi tu cu an um hraw rih lo. Cun, ruah a sur caan ahcun lam tang in ti a luan khawh lo ca ah lam cung ah ti zong aa dil i chawhlehnak a dawn ngai,” tiah Pu Biak Sang zong nih a chim.
Vawlei a tlaknak khor cu ceertual kam in a kal mi luti hor, lam tang in an kalternak zawn ah a si. Khor zawn ah cun, luti kalnak an rak ser lio ah a khuh thir an hman mi hmuh a si lo i thing an khuh mi lawng hmuh khawh a si.
Lamtang luti luannak an ser mi a feh lo ruang ah atu bantuk in a rawhnak a si i tuanvo ngeitu nih an remh colh lo ahcun aa chawklet mi ca ah tihnung a si, ti zong pawngkam mi nih an chim.
