Thantlang peng, Vomkua ah cinghngia a run in an hrang i January thla chung ah innzuat saṭil pahra leng an seh, tiah tualchungmi sin in theih a si.
Hi cinghngia pawl hi January zarh hnihnak hrawng ah Vomkua ram ah an hmuh hna i khuami hna i caw, naa le vok 10 leng an seh cang.
Tualchungmi pakhat nih, “January zarh hnihnak ah khan kan khua i nichuahlei tlanglo ah a bu in an hmuh hna. Cinghngia paruk leng an si. Cuka ah cun vok pahnih an seh. Cu hnu cun tlawmpal a dai i zarh khat hnu ah caw pahnih, naa pahnih le vok pariat an seh ṭhan,” tiah Zalen ah a chim.
Lo ah an zuat mi saṭil pawl cinghngia run nih an seh dih hna lai ti mi an phan caah kah ding in khuami nih an kawl hna nain an hmu kho rih hna lo.
Vomkua ram ah atu bantuk in cinghngia nih a run in innzuat saṭil seh ti mi hi a rak um ballo, atu hi a voi khatnak a si, tiah khuami nih an chim.
