Pu Henry Van Thio nih Mee thlatu rammi hna sin zumhtlak sinak biakam a buar i ralhraang council sin aa fonh ca ah NLD party chungtel sinak in kan phuah tiah nihin nithla khenh in NLD nih cathanh an chuah.
Hi biakhiahnak hi, nizan ah tuah mi a voi 2nak central committee lakhruak meeting ah mi tam u hnatlaknak in khiah mi a si tiah an langhter.
“Rammi duhnak biapi ah chia in rian a tuan mi party i a hmuitinh hna le policy pawl ka zulh lai tiah bia aa kam pin ah, 2020 thimnak ah party aiawhtu Amyotha Hluttaw palai pakhat sinak in mee thlatu rammi hna duhnak biapi ah ka chiah lai ti mi rammi hna sin biakamnak a buar caah Pu Henry Van Thio cu NLD party chungtel sinak in kan phuah,” tiah cathanh ah an langhter.
Pu Henry Van Thio cu 2016 – 2021 Hluttaw caan chung ah party nih zumh ngai in tuanvo kan pek mi Vice President a rak si nain atu ah cun rammi hna cung ah hrem, tlaihkhih, thah nawn le sualnak phun za kip a tuah mi nawlngeihnak chuttu phu he July 31 ah aa fonh mi hmuh a si ti zong cathanh ah an telh.
Ralhraang council nih NLD party Chairman, Vice Chairman, CEC chungtel pakua leng ah NLD party chungtel tampi thong an thlak hna ti mi le, NLD party cu ramkomh pumpi in democracy a duh mi tlangcung mi hna le rammi hna he hmun khat ah kan dirti ti zong cathanh ah an langhter.
Ralkap nih nawlngeihnak hramhram in an laak hnu ah Vice President Pu Henry Van Thio cu SAC nih tuah mi National Defence and Security Council meeting ah a kai bal lo nain 2023 July 31 ah tuah mi meeting tu ah cun hmai panh lo ngai in aa tel mi hmuh a si.
