Myanmar ram Vice President Pu Henry Van Thio cu February 13 ah Falam khua a phan i Tikir, Thantlang le Hakha zong a pal pah lai, tiah Chin Ramkulh Cozah Lamsuul Minister sin in February 13 ah kan theih.
“Ram hruaitu upate khuallam hi a dikdiar in chim phung a si lo i chim khawh zong a si fawn lo. Tutan a hung tlun hi Falam Surbung Vanlawngbual a chambau mi pawl a zohfel lai. Cun, Tikir khua zong ah a kal lai. A bik in Thantlang ah tuah ding mi Chin Miphun Ni kong ah a lungrethei i a si kho men. Zeicatiah, Myanmar ram in President U Win Myint maw, Ruahnakpetu Daw Aung San Suu Kyi maw, pakhat poh cu a tlung ding an si ca ah hmunhma le thil sining a hung zohfel ta bia a si theo lai. Cun, Hakha zong ah a ra lai. Zeitik nicaan ah cu khua a phan lai, a riak lai, a lan lai, tibantuk cu kan chim kho lo,” tiah Minister Pu Sui Thio nih The Hakha Post ah a chim.
Tutan Vice President Pu Henry Van Thio tlun ah Chin Ramkulh Cozah tuanvo ngeitu zong amah don le zulh ah an kal dih i zeitik ah a kir than lai, tibantuk thawng belte a fiang rih lo.
