Vice President Pu Henry Van Thio Chinram lamsuul zohfel than ding in a tlung

Myanmar ram Vice President Pu Henry Van Thio cu May 16 ah Kalay a phan i Tonzaang lei ah a lan lai, tiah tuanvo ngeitu sin in May 15 ah kan theih.
“Kei zong atu hi amah don le zulh ding ah Kalay lei kaa thawh. Tonzaang in kan i thawk lai i Hakha lei tiang kan ra te lai. Tutan zong motor in a ra than lai. Anih hi Chinram lamsuul biapi ah a chia zungzal mi a si. Pyidaungsu Lamsuul Minister le Minister dangdang nih an rak zulh lai,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
Hi kong ah Chin Ramkulh Cozah Lamsuul Minister Pu Sui Thio nih, “President pakhat a khuallam hi kan fiang cia lem lo. Asinain, Suurbung vanlawngbual le Rih lei tiang kal aa tim rua. Atu hi a voi hnihnak Chinram lamsuul a zohfel a si,” tiah The Hakha Post ah a chim.