Thantlang peng Tikir khua ah ralzam inndawng 31 caah Vice President 2 Pu Henry Van Thio le Thantlang siipin bawmhnak in dinti cu suimilam 24 chung pek an si cang tiah theih a si i, hi kong ah a tanglei bantuk in Thantlang Siipinhmu Pu Van Za Uk nih hitin The Hakha Post ah a chim.
“Vice President 2 Pu Henry Van Thio nih ralzam inn 31 hna caah dinti lak piak hna u law a kan ti i, amah Vice President 2 Pu Henry Thio nih ti-peih (Pipe) hi a bawmh hna. Cun a dang a dihheu mi tete cu kanmah siipin lei in kan bawmh khawh tawk kan bawmh ve hna i anmah lei zong in an i rin mi a rak um ve. Cucaah tlamtling tein kan ilim kho,” tiah a chim.
Dinti an pek khawh mi hna zat kong ah Thantlang siipinhmu Pu Van Za Uk nih “Tutan kan tuah mi dinti hi ralzam inndawng 31 caah a si i, thla ni 16 ah rian ngeitu hna kha kan van pha i, zan thum kan va riak. Thla ni 18 zan ahkhan khua chung ah dinti kan phakter khawh cang. Second 43 ahhin dinti Galan 5 in khua chung ah a luang kho. Cucaah inndawng 31 an si i, minung in 178 an si caah dinti kong ah duhdim ngai in an hmang kho cang,” tiah The Hakha Post ah a chim.
Thantlang siipinhmu Pu Van Za Uk nih a chimchap mi cu “Tu ralzam caah dinti kan lak piak mi hna hi Tikir khuapi minung 417, inndawng 97 nih an hmanmi dinti he tahchunh tikah tutan kan lakpiak mi hna hi a tam deuh, duhdim ngai in an hman khawh cang lai,” tiah The Hakha Post ah a chim.
Tikir khua ah inndawng 97 an um i, tutan dinti tuahpiak mi ralzam hna hi inndawng 31 an si tiah kan theih. Ralzam hna hi Palewah peng Miza khua in ral tih ruang ah 2019 kum ah ralzam dirhmun in Tikir khua ah a rak zam mi an si tiah theih a si. Tikir khua an rak phak ahhin inndawng 21 an si i, minung 126 an rak si tiah theih a si.
